Per la segunda giada suenter il 2013 è Nove Mesto l’ospitant dal campiunadi mundial da biatlon. Dapi il 2012 vegn er organisà là regularmain cursas da la cuppa mundiala. En la Arena Vysocina han plaz 20’000 fans. Tenor la IBU, la Federaziun internaziunala da biatlon, è quai il pli grond stadion en il circus da biatlon. A l’ur da loipa vegn spetgà ulteriurs 10’000 fans.
Campiunadi mundial da biatlon 2024 a Nove Mesto
12 decisiuns en 12 dis
Tut en tut vegn surdà a Nove Mesto 12 sets da medaglia. Sin il program stattan ina cursa da staffetta maschadada, cursas da sprint, cursas da persecuziun, cursas individualas, ina staffetta individuala maschadada, cursas da staffettas e cursas cun partenza en massa.
Biatletas e biatlets svizzers a Nove Mesto
Swiss Ski ha nominà 10 atletas ed atlets per il campiunadi mundial en Tschechia. Tar las dunnas èn quai las medemas 5 biatletas sco al davos campiunadi mundial il 2023 ad Oberhof en Germania. Dasper il trio grischun cun las duas soras Elisa ed Aita Gasparin e Lea Meier dal Partenz èn quai Amy Baserga e Lena Häcki-Gross. Tar ils umens va a la partenza il quintet cun Joscha Burkhalter, Jeremy Finello, Niklas Hartweg ed ils dus frars Gion e Sebastian Stalder.
Schanzas da medaglia
Il grond trumf svizzer a Nove Mesto è Lena Häcki-Gross. La biatleta dad Engelberg ha en questa stagiun fitgà pe tar las meglras dal mund ed sa preschentada fin uss en ina furma excellenta. Dacurt ad Antholz ha ella pudì festivar sia emprima victoria en la cuppa mundiala. Ella ha gudagnà la cursa individuala e dus dis pli tard vegnida terza en la cursa cun partenza en massa. Tar ils umens han Sebastian Stalder e Niklas Hartweg las meglras cartas sin in top resultat.
Las grondas favuritas ed ils gronds favurits
Tar las dunnas vegn spetgà cursas fitg interessantas. Las pli grondas candidadas da medaglia èn la Norvegiaisa Ingrid Tandrevold, la taliana Lisa Vittozzi, la Svedaisa Elvira Öberg ed il trio franzos cun Justine Braisaz-Bouchet, Julia Simon e Lou Jeanmonnot. Ed en il ravugl da quellas favuritas tutga da nov er Lena Häcki-Gross. Tar ils umens èn ils Norvegiais ils gronds favurits, cunzunt il grond dominatur dals davos onns, Johannes Thingnes Bö.
