Las duas soras Elisa ed Aita Gasparin sa legran fitg sin il campiunadi mundial a Nove Mesto en Tschechia. I saja ina da las grondas tribunas en il biatlon ed i regia là adina in’atmosfera gigantica, uschia las duas biatletas engiadinaisas ch’èn gia stadas a la partenza tar l’emprim campiunadi mundial a Nove Mesto il 2013.
In campiunadi mundial quasi da chasa per Elisa
Elisa Gasparin è dapi onns ensemen cun Martin Janousek, il Tschec che lavura era tar Swiss Ski ed è era trenader privat ed um da service da las soras Gasparin. Uschia è il campiunadi mundial a Nove Mesto er in zic in event da chasa per la biatleta da 32 onns. Per l’emprima giada vegnan er ils geniturs da ses ami a mirar sias cursas, quai fetschia grond plaschair, uschia Elisa Gasparin ch’ha fin uss dentant gì ina schletta stagiun. Gia la stad n’ha ella betg pudì trenar sco giavischà, lura anc vegnida franada d’ina blessura vi da las spatlas e curt avant Nadal gì corona uschia ch’ella ha tranter auter era manchentà las cursas da la cuppa mundiala da chasa a Lai mez december.
Ils 9 da favrer – in di tut spezial per Aita
Procurar per in emprim exploit vul Aita Gasparin en sia emprima cursa, il sprint. Questa cursa è il venderdi, ils 9 da favrer, quai di che la giuvna da las Gasparin festivescha l’anniversari da 30 onns. La finamira saja da vegnir atras quest sprint senza sbagls da sajettar, quai ch’eri era gia grtegià al davos campiunadi mundial avant in onn ad Oberhof. Quai fiss in bel regal sin natalizi, independent dal resultat final, uschia Aita Gasparin.
Il siemi d’ina medaglia en la staffetta
Ambiziuns da gudagnar ina medaglia dastgan las soras Gasparin però avair en la cursa da staffetta, quai ensemen cun Lena Häcki-Gross ed Amy Baserga. Quai saja dapi onns in siemi. En questa stagiun hai duas giadas mancà be pauc per in plaz sin il podest en la cuppa mundiala. Tant ad Oestersund en Svezia sco er a Ruhpolding en Germania è il quartet svizzer mintgamai vegnì quart.
Per Elisa ed Aita Gasparin vala il campiunadi mundial a Nove Mesto er in zic sco l’emprova generala per il campiunadi mundial il 2025 a Lai. Lura pon las duas soras Gasparin, sche tut va bain, ir a la partenza quasi avant isch-chasa, quai che fiss franc in dals puncts culminants insumma en la carriera da las duas biatletas rumantschas.
