Cun ina cursa perfetga ha Lena Häcki-Gross battì en il Tirol dal Sid en l’Italia l’entira concurrenza ed uschia confermà sia grondiusa furma. Ella ha tutgà las 20 schibas ed è uschia stada ina da be trais atletas cun nagins sbagls da sajettar ed ella ha era persvadì en la loipa. La finala ha Häcki-Gross gudagnà avant las duas franzosas Julia Simon ch’ha fatg dus sbagls da sajettar e Lou Jeanmonnot cun in sbagl da sajettar.
Il podest:
- Lena Häcki-Gross (SUI) 36:49,0 minutas
- Julia Simon (FRA) +20,2 sec.
- Lou Jeanmonnot (FRA) +31,4 sec.
Finalmain il pass il pli sisum
Lena Häcki-Gross è suenter Selina Gasparin pir la segunda biatleta svizra che po gudagnar ina cursa da la cuppa mundiala. L’Engiadinaisa che vala sco la pioniera dal biatlon en Svizra aveva gudagnà avant passa 10 onns, il december 2013, dus sprints, in a Hochfilzen en l’Austria ed in a Le Grand-Bornand en la Frantscha. Dapi lura ha la Svizra stuì spetgar sin in tal triumf. Fin uss era in segund plaz il meglier resultat da la carriera per Häcki-Gross. Quest resultat aveva la biatleta da 28 onns cuntanschì en questa stagiun en la cursa da persecuziun a Ruhpolding en la Germania.
Buna prestaziun dad Aita Gasparin
Cun Aita Gasparin ha anc ina segunda biatleta svizra persvadì en questa cursa singula ad Antholz. Cun dus sbagls da sajettar è la giuvna da las Gasparins vegnida 21avla, quai cun in retard da bun trais minutas sin la victura, sia collega d’equipa Lena Häcki-Gross. Dà or da maun in top resultat tar la davosa visita en il stan da sajettar ha Amy Baserga. Là ha ella anc fatg dus sbagls da sajettar e cun total trais sbagls ha la giuvna da Nossadunnaun la finala stuì sa cuntentar cun il 36avel plaz. Elisa Gasparin ha fatg gist quatter sbagls da sajettar ed è vegnida 63avla.
Ad Antholz stat la sonda sin il program ina staffetta maschadada singula ed ina staffetta maschadada. La dumengia spetga lura la cursa cun partenza en massa sur 12,5 kilometers.