En il Valais èn vegni duvradas chamonas mobilas per la chatscha sin lufs. Chatschaders vallesans fetschian uschia chatscha sin lufs cun meds dispitaivels. Per la chatscha usitada sajan talas metodas scumandadas. Ina da las tegias sa chattia paucs meters sper ina senda da viandar. Ultra da quai na vegnia betg fatg attent a la chatscha da lufs. Lubì las tegias mobilas aveva il chantun. Quai reproscha la gruppa per la protecziun dal luf “Luf Svizra» –la SonntagsZeitung rapporta.
I saja in privel per la segirezza publica
Quai di David Gerke da la gruppa Luf Svizra. El ha gia gì sminà che il chantun Valais haja praticas da chatscha plitost criticas, en vista dals blers lufs ch’èn gia vegnì sajettads. Observaziuns ed annunzias da terzas persunas hajan mussà che i dettia pliras da quellas tegias. Il medem model da tegia saja era vegnì duvrà per ils pasturs la stad sin alps da nursas.
Per Gerke sa tschenta uschia la dumonda, sche quellas tegias mobilas sajan eventualmain finanziadas cun meds per la protecziun da muntaneras. Uschia fissan ils meds utilisads per in auter intent che previs. Cunquai che la tegia sa chatta er sper ina senda da viandar, saja quai latiers er in privel per la segirezza publica.
Uschia haja in guardiaselvaschina sajettà mez december in chaun da protecziun da muntaneras sin la chatscha da lufs. Il chatschader sin incumbensa dal chantun ha sbaglià l'animal durant ses engaschi la notg.
Tenor il chantun vegn la chamona utilisada mo durant la notg
Il chantun Valais conferma en ina posiziun d'avair plazzà la chamona. Perquai ch'i sa tractia d'ina instituziun provisorica che vegnia messa giu pli pauc che 3 mais, na dovria la chamona nagina permissiun da construcziun. Ella vegnia mintgamai duvrada per il temp da notg, «sche naginas persunas n'èn preschentas en questa regiun».
