La gruppa per la protecziun dal luf «CH Wolf» vul proteger ulteriurs trieps. Sco quai che la gruppa scriva en ina communicaziun, hajan els perquai fatg recurs tar il Tribunal administrativ federal.
La gruppa pretenda che tut ils lufs vegnan protegids, e betg be quels ch'èn actualmain protegids grazia a recurs dad autras organisaziuns per la protecziun da l'ambient. Il recurs da «CH Wolf» sa drizza cunter la decisiun da dastgar sajettar trieps da lufs a moda proactiva en ils chantuns Grischun, Son Gagl e Vallais. La lubientscha correspundenta aveva l'Uffizi federal d'ambient dà la fin da november 2023.
La gruppa per la protecziun dal luf «CH Wolf» è ina organisaziun partenaria da l’uniun Luf Svizra.
Gruppa spera ch'i dettia in stop
Las chatscha sin lufs lubida haja tenor l’opiniun da la gruppa per la protecziun dal luf «CH Wolf» la finamira da «sragischar per gronda part ils trieps da lufs en Svizra». Quai cuntrafetschia a la Convenziun da Berna che suttamettia il luf sco spezia d’animals periclitada e protegida rigurusamain. Las schluppettadas permessas dals chantuns sajan succedidas «a moda illegala».
Cun il recurs haja la gruppa per la protecziun dal luf «CH Wolf» l'intent da sclerir da princip la legalitad da las schluppettadas succedidas ed ella speria era ch'i dettia immediatamain in stop da la chatscha sin ils trieps, tar ils quals autras organisaziuns per la protecziun da l'ambient n'han betg inoltrà recurs, scriva l'organisaziun.
