Datiers dal vitg Oleyres en il chantun Vad è in corp d'in luf vegnì chattà. Examinaziuns han mussà ch'il luf è mort pervia d'ina arma da fieu. Las autoritads supponan ch'i n'ha betg dà ina lubientscha per sajettar quel luf.
Il luf è stà in mastgel da radund 32 kilos. Chattà è el vegnì ils 3 da schaner en in guaud. I na dettia naginas persunas suspectusas. Il luf vegn anc identifitgà tenor sia DNA. Tenor las inspecziuns saja il luf vegnì sajettà circa in'emna avant che ses corp saja vegnì chattà.
Perquai ch'i n'ha betg dà ina lubientscha da sajettar il luf, han las autoritads inoltrà ina denunzia penala cunter la persuna nunenconuschenta ch'ha sajettà sin il luf. La procura publica vegn ad intercurir il cas e sias circumstanzas.
Igl è l'emprim cas da fraud da lufs en il chantun da Vad, din las autoritads dal chantun. Enfin uss hai dà cas da fraud da lufs-tscherver. En cas da fraud poi dar multas e fin in onn praschun en il chantun Vad.
