L’uniun «Luf Svizra» ha inoltrà in recurs da surveglianza cunter tschintg chantuns. Uschia speria l’uniun da pudair impedir che dapli lufs vegnian sajettads, sco ella ha communitgà oz. Las lubientschas da sajettar lufs en ils chantuns Grischun, Vallais, Son Gagl, Vad e Tessin cuntrafetschian al dretg. Quai, perquai che l’Uffizi federal d’ambient n’haja fin uss betg publitgà la procedura d'approvaziun en chaussa e manchentà eventuals recurs cunter la disposiziun, scriva l’uniun vinavant. Ils chantuns Grischun e Vallais avevan gia ordavant franà da regular ils trieps da lufs pervi da recurs da pliras organisaziuns per la protecziun da la natira.
Il luf saja ina spezia d'animals protegida rigurusamain
Cun la politica da reducziun actuala cuntrafetschia la Confederaziun ultra da quai a la veglia dal pievel ed a la convenziun da Berna. Il luf saja tenor la convenziun da Berna, ch'è ratifitgada da 46 stadis europeics ed ulteriurs stadis, ina spezia d'animals protegida rigurusamain. Tar la convenziun da Berna ha l'uniun Luf Svizra gia inoltrà in recurs l'entschatta december.
Il Cussegl federal aveva mess en vigur il prim da november l’emprima part da la midada da la lescha da chatscha per in temp limità. Uschia han ils chantuns retschavì la pussaivladad da far «reducziuns preventivas da la regulaziun» gia il december ed il schaner, premess ch’els han obtegnì il consentiment da l’Uffizi federal d’ambient (UFAM).
Or da l'archiv:
