Er suenter la surpigliada da la Credit Suisse tras la UBS e las mesiras da pliras bancas centralas resti malruassaivel a las bursas. Suenter ch'omaduas aczias avevan pers a la bursa è l'aczia da l'UBS puspè sa revegnida ed ha serrà la saira cun in plus. Quella da la CS è restada pulit stabila enturn la valur chîls acziunaris e las acziunarias vegnan a survegnir da la vendita.
Stabilisar il mund da finanzas
Cun surpigliar la Credit Suisse gida l'UBS da segirar la stabilitad finanziala, hai gì num dumengia saira davart da la Banca naziunala svizra (SNB). Plinavant hajan ins uschia chattà ina varianta per proteger l'economia publica svizra.
Tut las duas bancas hajan uss access a las facilitads da la SNB. Plinavant pon UBS e Credit Suisse survegnir emprests da liquiditad fin a 200 milliardas francs. Uschia duai vegnir garantida la liquiditad da las bancas. Plinavant dat la Confederaziun ina garanzia da perdita a l'UBS da fin 9 milliardas francs. Questa garanzia vala dentant pir suenter ch'in tschert cunfin è surpassà. Perditas da fin 5 milliardas surpiglia pia sco emprim mo l'UBS, e pir en in segund pass la Confederaziun.
Per trais milliardas francs
La UBS paja trais milliardas francs per la Credit Suisse, quai en furma dad aczias. Quai munta ch'i dat 0,76 francs per aczia da la CS. Per cumparegliar: il venderdi saira valeva ina aczia da la CS 1,86 francs.
La fusiun duai esser terminada enfin la fin dal 2023.
Las decisiuns èn vegnidas fatgas sin basa d'ordinaziun d'urgenza dal Cussegl federal. Quel dretg è dentant limità. Il parlament sto perquai dar ses consentiment.
Regenza deplorescha che surpigliada è necessaria
Cun surpigliar la Credit Suisse gida l'UBS a segirar la stabilitad finanziala, scriva la Banca naziunala svizra (SNB). Plinavant hajan ins uschia chattà ina varianta per proteger l'economia publica svizra.
Il Cussegl federal deplorescha, che la Credit Suisse n'ha betg pudì schliar sez ses problems. Quai ha la ministra da finanzas, Karin Keller-Sutter, ditg la dumengia saira avant las medias. Il Cussegl federal saja dentant persvas d'avair cun la versiun actuala ina buna soluziun. Cun quella veglian ins salvar ils interess da la Svizra, uschia Keller-Sutter.
Senza soluziun avessi dà grondas consequenzas per clients privats, ha il Cussegl federal communitgà. In concurs da la Credit Suisse avess gì consequenzas fatalas. Tenor il schef da la SNB, Thomas Jordan, saja la decisiun stada necessaria, cun quai che la Credit Suisse vala sco relevanta per il sistem.
Sin la dumonda d'in schurnalist, quant che «quest'acziun vegn a custar la populaziun», respunda Karin Keller-Suter, ch'in concurs avess creà ina pli gronda perdita. Il ristg per ils pajataglias saja pitschen.
Reacziuns sin ils schabetgs
- Per la PPS è la crisa da la Credit Suisse ina consequenza da citat: «nauscha administraziun ed entretschaments da la PLD». Per la PPS ha il Cussegl federal ussa agì memia svelt.
- Il copresident da la PS, Cédric Wermuth, è frustrà e grittentà. Dapi la crisa da finanzas il 2008 na saja nagut sa midà, uschia Wermuth sin Twitter. L'entir sistem da finanzas saja «malsaun ed absurd».
- Per l'Allianza dal Center èsi la meglra da tut las nauschas schliaziuns.
- La PLD beneventa che betg la Confederaziun surpiglia la CS.
- Per l'Associaziun svizra da banchiers fa la surpigliada da la CS tras la UBS senn. La stabilitad dal martgà da finanzas svizzer saja impurtant per l'entira economia svizra.
- Il president da la conferenza dals directurs da finanzas, Ernst Stocker beneventa las decisiuns. Ussa stoppian ins analisar las consequenzas per l'economia publica ed il martgà da lavur.
