Era per l'expert da finanzas Damian Gliott è la surpigliada da la CS entras l'UBS stada ina surpraisa. Tenor el avessi dà autras schliaziuns – sco per exempel ch'il stadi u la banca naziunala avessan pudì dar ina garanzia ed uschia parter si la Credit Suisse en pliras parts e vender quai al martgà liber.
Uschia han ins quasi regalà la banca per in bun pretsch a l'UBS.
L'expert da finanzas n'è betg mo surstà, mabain era betg daltut cuntent cun questa schliaziun ch'il Cussegl federal ha prendì sa basond sin il dretg d'urgenza. El vesa era las grondas consequenzas en il mund da banca. Cun quest dretg d'urgenza pudess il stadi er en il futur decider sur ils acziunaris ora. Tenor Gliott muntia quai che l'acziunari pudess uschia pretender in meglier pretsch u la persuna che cumpra obligaziuns in tschains pli aut e quai na saja betg en il senn da las bancas.
In ulteriur problem sa mussa en la situaziun da bancas en Svizra. Ina banca gronda - la Credit Suisse - svanescha e l'autra banca gronda, l'UBS vegn anc pli gronda.
L'UBS è uss bler memia gronda per la Svizra.
Gliott aschunta sche l'UBS haja tuttenina problems finanzials, na pudess la Svizra betg pli salvar ella. L'expert da finanzas spera ch'ina part da questa «nova UBS» vegnia perquai vendida. Ins stoppia uss cunzunt survegliar bain la banca.
Reacziuns en il Grischun
En il Grischun èn las reacziuns en chaussa reservadas. La Banca Chantunala Grischuna na piglia actualmain betg posiziun. Sin dumonda da RTR scriva la GKB dentant ch’ins beneventia la decisiun. Quella gidia da sclerir la situaziun e gidia da mantegnair la fidanza en la Svizra sco lieu da finanzas.
Er Alfons Quinter, manader da la Banca Raiffeisen Cadi dat en la medema crena. Tenor el haja la surpigliada da la Credit Suisse per ils blers clients nagina influenza.
