Che la Credit Suisse è en miseria, haja mintgin pudì vesair, di Beat Wittmann che lavura gia dapi bunamain 40 onns en il sectur da finanzas ed è partenari d’ina firma da cussegliaziun a Turitg. La decisiun da la Confederaziun da guardar che l’UBS cumpra la Credit Suisse saja perquai stada la dretga decisiun sut las circumstanzas actualas.
Decisiva è la stabilitad dal sistem da finanzas. E quai han ins cuntanschì. Ma natiralmain vegn quest debachel ad avair consequenzas vastas en la politica ed en l’industria da finanzas.
Che la regulaziun da Too-Big-to-Fail n’ha betg pudì evitar quest debachel n’è per el era betg ina surpraisa. En la teoria na saja quai nagina chaussa da reparter ina banca en pliras parts, da salvar la fatschenta indigena e da laschar ir concurs il rest. Ma cun la realitad haja quai da far pauc.
L’entir concept n’è betg praticabel e sto vegnir abolì. I n’è era betg imaginabel ch’insatgi da la politica avess cumenzà ad activar Too-Big-to-Fail l’atun passà. Lura fiss la politica stada confruntada cun la renfatscha d’avair provocà questa crisa.
En la responsabladad vesa el perquai la politica. Ella stoppia prender per mauns la mastrina e betg sa zuppar davos frasas sur il martgà liber e las interpresas privatas.
Bancas ch’èn relevantas per il sistem n’èn nagina chaussa privata nua che la politica po sa zuppar e dir ch’ils acziunaris decidian qua tge che capita. Uss avain nus vis la fin d’emna che sche quai na funcziuna betg lura è il backstop la regenza.
Il backstop, l’ultima soluziun, quest èn tar la Credit Suisse 200 milliardas francs liquiditad da la Banca naziunala svizra ed ina garanzia da 9 milliardas francs da la Confederaziun. Tge che fiss da far percunter saja en sasez cler, di Beat Wittmann.
La Svizra sto introducir il sistem da las bancas spezialisadas. Quai vul dir che la fatschenta classica da las bancas, il traffic da pajaments sco er la retschavida da daners ed ils credits ston vegnir separads da la fatschenta d’investiziun, il commerzi a la bursa e la finanziaziun da fusiuns e surpigliadas. Ubain restrenscher il sectur d’investiziun da la banca sin ina grondezza raschunaivla, sco che l’UBS ha fatg, di Wittmann.
Quai n'ha la Credit Suisse mai fatg ed è perquai era la raschun per ils problems.
Ultra da quai sto vegnir augmentada la summa da l’agen chapital da las bancas e sco terza punct sto vegnir curregì il dischequiliber tranter lavur prestada ed ils salaris e las bunificaziuns dal cader e dal cussegl d’administraziun da las bancas.
Anc adina è il sistem uschia ch’ins po socialisar las sperditas e ch’ins privatisescha ils gudogns.
Beat Wittmann è da buna speranza che la politica daventia uss activa. Pressiun spetga el surtut era da la populaziun che vegnia a sentir las consequenzas da quest salvament.
La fusiun da questa banca vegn ad esser ina chaussa fitg dolurusa, lunga e cumplexa. I vegn a dar bleras dublettas tar las filialas e plazzas da lavur e.u.v. E perquai sun jau atgnamain optimistic che tschertas discussiuns han finalmain lieu e ch’i vegn fatg tscherta remedura.
Sche quai n’è betg il cas ristga la Svizra ina catastrofa anc pli gronda. La summa da bilantscha da la nova UBS è numnadamain dubel uschè gronda sco il product naziunal brut (BIP) da la Svizra.