Parlamentarias e parlamentaris en Chasa federala a Berna daventan pli e pli transparents quai che pertutga lur entradas, vul dir, quant ch'els ed ellas gudognan cun mandats. 58% dals commembers dal Cussegl naziunal e dal Cussegl dals chantuns tradeschan entant quant ch'els survegnan or da lur engaschis en cussegls administrativs, gremis d'associaziuns u sco consulents. Quai resulta da la glista da transparenza da la plattafurma Lobbywatch. Avant sis onns avevan be 25% dals parlamentaris federalas tradì lur entradas. I dettia entant ina midada marcanta tranter las fracziuns.
PLD: Per l'emprima giada il Gion davos
Sco quai che Lobbywatch scriva plinavant, han 143 dals 246 parlamentaris tradì a moda detagliada quant ch'els fadian cun lur incumbensas en cussegls d'administraziun, gremis d'associaziuns u sco consulents. In cler progress haja fatg la Partida populara svizra. 41% dals parlamentaris da la PPS han tradì lur pajas. Il pli transparent èn ils parlamentaris verds: 96% d'els han demussà quant ch'els gudognan cun lur mandats. Sin plazza dus suondan ils commembers da la Partida socialdemocratica: D'els han 94% mess sin maisa lur entradas. Per l'emprima giada a la fin da la glista da rangaziun è la Partida liberaldemocratica. Sulettamain 31% dals parlamentaris da la PLD èn stads pronts da tradir tge ch'els gudognan.
Cussegl naziunal è pli transparent che Cussegl dals chantuns
Tranter las duas chombras parlamentaras datti entant grondas differenzas. Cun 63% è il Cussegl naziunal cleramain pli transparent ch'il Cussegl dals chantuns cun 39%. Ed era tranter um e dunna datti differenzas marcantas. Politicras paran d'avair pli paucs problems da tradir lur entradas che lur collegas masculins. 73% da las dunnas en il parlament svizzer han declerà lur pajas. Tar ils umens èn quai be 49%.
Ultra da quai mussa la glista da transparenza:
- pli ditg en uffizi, pli pauc transparent
- giuvens èn pli transparents che vegls
- parlamentaris romands e dal nord da la Svizra èn pli transparents che lur collegas or dal rest dal pajais
