Il glindesdi Pasca hai dà traffic da return e colonnas avant il portal sid dal tunnel dal Gottard. Ils autos èn stads enfin a 1 uras e mesa en colonna. Er avant il portal dal nord en il chantun Uri hai dà colonnas da plirs kilometers. Gia la sonda e la dumengia hai dà impediments da traffic. Er en il chantun Grischun è il traffic da Pasca stà da percorscher, tant sin l'A13 tranter La Punt/Rehanau e Giuvaulta sco er en il Mesocco hai dà colonnas.
Qua vai tar la situaziun actuala da las vias e dal traffic.
Prognosas da traffic
Perquai che Pasca saja tard quest onn e croda, en bleras vischnancas dal chantun, en las vacanzas da scola, na stoppian betg vegnir spetgadas grondas interferenzas cun il manaschi da sport d'enviern, scriva l'Uffizi da construcziun bassa dal Grischun. Uschia saja pussaivel ch'il traffic sa repartia in pau meglier che durant auters onns. Però possia il fatg che las vacanzas a Baden-Württemberg (Germania) han lieu il medem mument, chaschunar ina concentraziun pli gronda a la fin da las vacanzas ils 27 d'avrigl 2025, scriva il chantun vinavant.
Per il traffic che charrescha en direcziun saja da princip da quintar cun dapli traffic in di avant il firà sco tal sco er il firà sez:
L'experientscha mussa ch'il traffic da return vers nord sa reparta meglier sur il di ch'il traffic da vacanzas en direcziun sid. Per il traffic da return saja da quintar cun in grond volumen da traffic durant ils suandants dis:
Restar en colonna u viagiar cun tren
Grond volumen da traffic cun colonnas e perditas da temp sin las axas principalas chaschuna savens traffic da guntgida betg giavischà, scriva l'ASTRA. Quel engrevgescha il mintgadi en ils vitgs per lung da las vias naziunalas e po la finala chaschunar in collaps dal traffic en las regiuns. Il traffic individual e da fatschenta local, il traffic public (bus, auto da posta) ed il traffic betg motorisà sin las vias chantunalas e communalas vegnan impedids e la ristga d'accidents crescha. L'ASTRA vul perquai che viagiaturas e viagiaturs restian – er en cas d'ina colonna – sin l'autostrada e na bandunian betg quella, e quai betg sco ultim per prender resguard envers la populaziun locala.
Il traffic n'è betg mo tema da Pasca:
L'Uffizi da construcziun bassa cusseglia a tut las participantas ed ils participants dal traffic da viagiar sche pussaivel ordaifer las uras da grond traffic u d'evitar dal tuttafatg quests dis. Da princip recumonda l'uffizi da duvrar il tren enstagl da bus ed auto.
Per laschar passar pli svelt las uras en colonna:
Mesiras en Grischun
Perquai che las mesiras realisadas la primavaira 2024 per lung da la A13 sajan sa cumprovadas, vegn l'Uffizi da construcziun bassa dal Grischun ad applitgar era quest onn il medem concept da traffic. Il concept cumpiglia mesiras per lung da la A13 da Zizers fin al tunnel Isla Bella, scriva il chantun. Per il traffic da return en direcziun nord èn previsas mesiras tranter Tusaun e Rehanau.
Concretamain vul quai dir, ch'il traffic vegn dosà en plirs lieus per lung da la A13 – saja quai tras persunal u cun agid dad amplas da traffic. La finamira è quella da minimar il traffic da guntgida da l'autostrada sin la via chantunala, da meglierar la circulaziun dal traffic en ils vitgs, da garantir che las organisaziuns a glisch blaua ed il traffic public possian passar senza impediments sco era da proteger la populaziun locala dad immissiuns supplementaras.