Il chantun Grischun vul sviluppar vinavant il traffic en l'aglomeraziun da Cuira. Perquai è vegnì elavurà in nov program cun mesiras sut l'egida da l'uffizi per il svilup dal territori, communitgescha il chantun.
Era las regiuns Lanquart, Plessur e Plaun èn stadas involvidas en il process d'elavurar il program – quellas regiuns pateschian ordvart fitg dal grond volumen dal traffic, scriva il chantun. En in proxim pass han persunas ed organisaziuns interessadas a partir da venderdi, ils 10 da schaner, in mais ditg la pussaivladad da prender posiziun davart las numerusas mesiras dal nov program che duain lura ir en vigur a partir dal 2028 fin il 2032.
Puncts centrals
Il nov program prevesa tranter auter d'optimar las staziuns sco lieus da midar tren u bus ed er da cumplettar l'infrastructura per il traffic da velos. Uschia duai per exempel vegnir engrondida la ruta da velos regiunala tranter Razén e Maiavilla.
Ina finamira è da reducir il traffic motorisà e d'animar la glieud d'ir cun il velo a la lavur.
Meglieraziuns duai però era dar per ils peduns. La rait da sendas da l'entira aglomeraziun saja per l'emprima giada vegnida resguardada sistematicamain, scriva il chantun. Sper il focus sin l'infrastructura da traffic hajan ins tenor la communicaziun era mess paisa sin mantegnair surfatschas verdas e spazi liber en l'aglomeraziun. Plinavant sajan da nov era ils temas biodiversitad, traffic turistic ed l'accumodament al clima vegnids integrads e resguardads.
La finamira principala è ch'il territori resta attractiv a lunga vista per la populaziun e per l'economia.
Daners da la Confederaziun
Il nov program d'agloramaziun custass tenor la calculaziun bun 134 milliun francs – la gronda part vegn investida en la mobilitad da peduns e velocipedists. La Confederaziun sustegna finanzialmain chantuns che presentan in program cun mesiras cleras tar il svilup da lur traffic, sco quel per l'aglomeraziun da Cuira. La premissa è ch'il program d'aglomeraziun coordinescha il svilup dals abitadis, dal traffic e la planisaziun da cuntrada. Sch'il program vegn approvà fin la fin 2027 da la Confederaziun, datti ina contribuziun che cuvra 30 fin 50% dals custs. Ils daners vegnan or dal fond per vias naziunalas e traffic d'aglomeraziuns (NAF). Mintga quatter onns (numnà generaziuns) vegn il program examinà da nov ed ils daners pajads.
Tar il program che vegn a partir dals 10 da schaner preschentà al public sa tracta gia dal program d'aglomeraziun en la tschintgavla generaziun – la versiun cun mesiras optimadas sin basa da la quarta generaziun. Il 2021 aveva il program d'aglomeraziun da Cuira rimnà en il rom dal program en la quarta generaziun projects per meglierar la situaziun da traffic en la regiun da la Val dal Rain. Quai program è vegnì inoltrà a la Confederaziun il settember 2021. La Confederaziun ha examinà ils projects e decis tge che vegn sustegnì en tge furma.
