L'enviern èn cunzunt ils lieus per lung da la A28 – numnadamain Jenaz, Schiers, Grüsch, Seewis, Zizers e Landquart Ost – pertutgads dal traffic da guntgida che chaschuna savens colonnas. La primavaira e la stad chaschuna il fitg grond volumen da traffic durant tscherts dis er per lung da la A13 adina puspè colonnas tranter Tusaun ed il cunfin chantunal. L'Uffizi da construcziun bassa dal Grischun (UCB) fa ussa in ulteriur pass ed examinescha in'ampla da traffic parzialmain automatisada a Zizers per optimar la regulaziun dal traffic.
Il traffic è sco aua e sch'ins tegna insanua, alura cula ella puspè ora insanua auter.
Tecnica innovativa per dapli effizienza e segirezza
L'indriz parzialmain automatisà registrescha ils dumbers da traffic en temp real, quai che pussibilitescha ina regulaziun dinamica. A las utilisadras ed als utilisaders da la via vegn communitgà – sur in monitur dad LED – il motiv per la mesira, sco per exempel «Surchargia dal traffic en il center dal vitg». Il medem mument vegn mussà quant ch'i dura fin la proxima fasa verda. La finamira è d'obtegnair ina circulaziun pli effizienta, uschia ch'il traffic sa mova en moda concentrada durant las fasas verdas. Uschia duai la quantitad da passagi vegnir augmentada. Cun il traffic rudlant vul ins minimar las grevezzas per la populaziun en il vitg e garantir sia protecziun. Quai fetscha era plaschair al president da vischnanca, Daniel Freund.
Cun quest pass giain nus en la dretga direcziun.
Fasa da test durant il manaschi d'enviern e da stad
L'ampla è vegnida mess en funcziun sonda, ils 8 da favrer 2025 , ed vegn examinà – ensemen cun las mesiras etablidas – en in manaschi da test durant l'enviern e la stad. Questa fasa serva ad agiustar detagliadamain quella ampla, ed ella vegn realisada en ina stretga coordinaziun tranter il UCB, la Polizia chantunala dal Grischun ed il traffic public. Uschia vul ins optimar ils andaments e garantir il manaschi ordinari.
Las enconuschientschas dal manaschi da test servan al UCB sco basa per examinar, sche questa tecnologia è adattada er per il traffic quotidian en auters lieus. La finamira a lunga vista è l'integraziun da questa soluziun en in dispositiv da traffic cumplessiv che reagescha en moda flexibla ed effectiva sin differentas grevezzas da traffic.