Durant in suentermezdi han debattà persunas cun impediments davart lur giavischs en vista ad ina participaziun politica. La sessiun è vegnida emessa en il livestream . Discutà è vegnì tge pass ch'i dovra per reducir ils obstachels existents e pussibilitar la participaziun politica da persunas cun impediments. A la fin han ellas deliberà ina resoluziun correspundenta.
-
Legenda: Il parlamentari Christian Lohr che maina la sessiun per persunas cun impediments. RTR
La sessiun è vegnida manada da Christian Lohr. El è dapi il 2011 per l'Allianza dal Center da la Turgovia en il Cussegl naziunal. El s'engascha fermamain per ils dretgs da persunas cun impediment. Ils dischavantatgs per persunas cun in impediment sajan anc adina gronds, di el. Lohr sez è naschì senza mauns e cun pes defurmads causa la catastrofa da medicaments cun Contergan. Ma sco frain n'haja el mai vis l'impediment. Per el e quai in fatg che dat curaschi da pir dretg s'engaschar.
Nus essans dal tuttafatg sutrepreschentads en la politica.
En la sessiun per las persunas cun impediments è vegnì debattà davart ina resoluziun. Quella duai tranter auter rinforzar la participaziun politica. Per l'ina duain persunas cun impediments vegnir motivadas da s'engaschar politicamain e da l'autra vart duain las partidas ed autras organisaziuns vegnir sensibilisadas da resguardar era persunas cun in impediment, di Lohr. La via d'inclusiun è anc lunga. Dentant suenter questa sessiun è la Svizra in'autra, da quai è il politicher persvadì.