Il carussel da candidatas e candidats per la successiun dal cusseglier federal da la PS Alain Berset gira dapi ch'el ha annunzià sia demissiun avant la pausa da stad. Fin dumengia proxima (29 d'october) ston ins annunziar candidaturas a la PS Svizra. Ils 25 da november vul la fracziun fixar ses bigliet per l'elecziun dal Cussegl federal.
Evi Allemann
La cussegliera guvernativa da la PS bernaisa ed anteriura cussegliera naziunala emprova per la segunda giada da far il sigl en la regenza naziunala. La directura da l'intern e da giustia bernaisa è s'engaschada gia il 2022 per la successiun da cussegliera federala Simonetta Sommaruga, ma ella n'è betg vegnida sin il ticket da la fracziun da la PS. Allemann è l'emprima dunna che va a la cursa sco successura pussibla da cusseglier federal Alain Berset. Cun Albert Rösti sesa gia in Bernais en il Cussegl federal. Ultra da quai èn ils commembers dal parlament en uffizi colliads meglier in cun l'auter en Chasa federala.
Malgrà che Allemann è relativ giuvna (annada 1978) po ella guardar enavos sin ina lunga carriera politica. Cun 19 onns è ella vegnida elegida sco pli giuvna deputada dal chantun Berna. Ella è stada 15 onns cussegliera naziunala – al cumenzament er la pli giuvna cussegliera ed ha midà il 2018 en la regenza chantunala da Berna.
Roger Nordmann
Il cusseglier naziunal da la PS dal Vad Roger Nordmann (annada 1973) vala sco politicher cun grond'influenza. Pir il zercladur ha el dà giu surprendentamain il presidi da la fracziun da la PS dal parlament federal suenter esser stà 8 onns en uffizi. L'entschatta october ha el annunzià ses intent da candidar per la successiun dad Alain Berset. Nordmann è l'emprim Svizzer dal vest en la cursa. Dapi il 2004 è el cusseglier naziunal. Ses focus da lavur è la politica d'energia. Nordmann sa vesa sco construider da punts. Sia candidatura na saja betg quella d'in Romand, mabain ina interdisciplinara e quella d'in Svizzer, di Nordmann. En vista a la midada dramatica dal temp na dovria nagin cusseglier federal cun interess regiunals. In terz Svizzer dal vest en la regenza naziunala saja uschia senz'auter pussaivel.
Jon Pult
Il cusseglier naziunal grischun Jon Pult (annada 1984) era vegnì numnà da blers sco successur pussaivel da Berset, l'entschatta d'october ha el lura annunzià ses interess per il sez da Berset. El, che sa numna sez Grischun triling, è dapi quatter onns en il Cussegl naziunal e vala sco in dals pli gronds talents da la PS e sco bun retoricher. Gia in onn suenter ch'el è entrà en il parlament ha la PS fatg or dad el in da ses vicepresidents. Sco commember da la regenza vuless Pult rinforzar la coesiun da la Svizra. Sfidas las pli grondas ha Pult numnà tar l'annunzia da sia candidatura la refurma dal sectur da sanadad, la politica dal clima e la politica d'Europa. In uffizi executiv n'ha Pult fin uss anc betg gì.
Beat Jans
Beat Jans (annada 1964) ha annunzià ils 22 da settember a chaschun d'ina conferenza da medias ch'el veglia daventar cusseglier federal. Che Jans possia candidar, na sa chapeschia betg da sez per el. I fiss ina «onur incredibla» d'astgar scriver vinavant vi da l'istorgia svizra, ha ditg Jans. Observaturs politics vesan Jans sco in dals favurits sin il post da regenza. Dapi il 2021 è el president da la regenza e schef dal departament presidial dal chantun Basilea-Citad. Dal 2010 fin 2020 è el stà cusseglier naziunal. Durant ses temp sco parlamentari federal è el stà durant tschintg onns vicepresident da la PS Svizra.
Matthias Aebischer
Il cusseglier naziunal bernais Matthias Aebischer (annada 1967) ha ditg a las medias mez settember ch'el saja vegnì a la conclusiun suenter in temp da ponderaziun la stad ch'el haja tut las premissas per il post dal cussegl federal. El haja ina clera voluntad da far quai, saja in team player, haja ina moda da gudagnar e veglia chattar soluziuns solidas en dumondas impurtantas, per exempel en la politica d'energia. Aebischer politisescha dapi prest dudesch onns en il Cussegl naziunal. Avant ses temp en Chasa federala era Aebischer tranter auter moderatur da differentas emissiuns tar SRF ed ha tras quai cuntanschì gronda enconuschientscha en la Svizra tudestga. Sche Aebischer vegniss elegì, fiss il chantun Berna represchentà duas giadas en la regenza naziunala.
Daniel Jostitsch
Il cusseglier dals chantuns da la PS da Turitg, Daniel Jositsch (annada 1965) ha dà enconuschent l'entschatta settember sia candidatura. El haja ponderà ditg e lung la nova candidatura, ha el ditg a las medias. El haja grond respect dal post dal Cussegl federal. Ma el saja ì en la politica per prender a mauns problems. L'onn passà n'ha Jositsch betg tschiffà il ticket uffizial da sia fracziun perquai che las candidaturas da dunnas per la successiun da Simonetta Sommaruga eran en il focus. E tuttina ha Jositsch survegnì plirs tozzels vuschs il di da l'elecziun. A la fin è la cussegliera dals chantuns dal Giura, Elisabeth Baume-Schneider, ida cun la plima. Per Jositsch sco cusseglier federal pledia tranter auter sia experientscha a Berna e sia derivanza urbana. Jositsch vala sco represchentant da l'ala dretga da la PS.
