Thomas Bergamin, president da la Cumissiun administrativa da la Baselgia catolica dal Grischun, è cuntent cha las scuvertas èn formuladas uschè cleras e ch'ellas menziunan er nums. Transparenza stoppia esser ussa la tenuta. Tenor el pudessan las scuvridas chaschunar diversas sortidas da la baselgia catolica, ma er, grazia al engaschament progressiv da l'uvestg Josef Maria Bonnemain, laschar nascher nova fiduzia en in'instituziun conscienta e transparenta.
Er la manadra dal departament federal da giustia e polizia, Elisabetg Baume-Schneider, ha prendì posiziun. Ils resultats dal studi sajan inquietants, ha ella ditg envers SRF. La baselgia haja protegì meglier ils delinquents e las instituziuns che las unfrendas. Ella haja però gronda fidanza en las autoritads da persecuziun penala. In studi da l'universitad da Turitg mussa ch'igl ha dà ils ultims 70 onns almain 1'000 cas d'abus sexual en la baselgia catolica en Svizra.
Vegn spetgà dapli cas
La co-autura dal studi quinta cun anc dapli cas. La baselgia haja savì da blers cas, haja però fatg pauc, di l’istoricra Monika Dommann envers radio SRF. I dettia probablamain anc bler dapli cas. Ella suppona che las unfrendas n’hajan savens betg denunzià las persunas or da tema u ch’ellas èn gia mortas.
Uvestg Morerod pront da sa retrair
En connex cun ils cas d’abus sexual en la baselgia catolica n’excluda l’uvestg da Genevra, Losanna, Freiburg e Neuchâtel Charles Morerod betg da sa retrair da ses uffizi. Sch’el avess da constatar d’avair fatg gronds sbagls saja meglier d'ir, ha ditg Morerod en in’ intervista cun la plattafurma «Arcinfo». Davart las renfatschas concretas cunter el n’ha Morerod vulì dir nagut. El spetgia cun calma ils resultats da l’investigaziun actuala ha el ditg envers la gasetta «La Liberté». L’uffizi sco uvestg na stettia el però betg uschè ferm a cor.
L'uvestg da Basilea, Felix Gmür ha ditg ch'ins haja guardà davent, betg tadlà tiers e bagatellisà. I saja vairamain nausch ch'ins n'haja betg cartì als pertutgads. L'uvestg da Son Gagl, Markus Büchel, ha concedì d'avair fatg sbagls ed è sa perstgisà. Ad el vegn renfatschà d'avair zuppentà cas d'abus. Büchel ha ditg ch'el haja instradà in'inquisiziun preliminara ed inoltrà ina denunzia penala cunter in spiritual.
L'administratur apostolic da Lugano, Alain de Raemy, ha ditg ch'i dovria giustia per las unfrendas. L'uvestgieu da Lugano empermettia d'elavurar meglier cas d'abus e l'uvestg da Sion, Jean-Marie Lovey refusa d'avair savì da cas u d'avair zuppentà tals. Consequenzas tira er l'avat da Saint-Maurice, Jean Scarcella. Sco quai ch'el communitgescha vegnia renfatschà ad el abus sexual ed il zuppentada da tals cas.
Avat da Saint-Maurice remetta ad interim
L'avat da Saint-Maurice en il Vallais, Jean Scarcella, remetta ad interim ses uffizi. Sco quai ch'el communitgescha vegnia renfatschà ad el abus sexual. El laschia perquai ruassar ses uffizi fin che las inquisiziuns sajan terminadas.
En la communicaziun empermetta Scarcella cooperaziun cumpletta a l'uvestg da Cuira, Joseph Bonnemain. Lez è incumbensà da la Conferenza d'uvestgs svizzers da far las inquisiziuns davart abus sexual en la Baselgia catolica svizra.
