Grazia a trapla fotografica: Maletgs da lufs e lufs-tscherver
-
Bild 1 von 5. Dus lufs-tscherver giuvens èn vid giugar. Talas fotografias fan batter pli fitg il cor da Daniel Zuppinger. Bildquelle: Daniel Zuppinger.
-
Bild 2 von 5. In giat selvadi europeic fotografà d'ina trapla da Zuppinger. Il giat selvadi ha tschiffà in durmigliet. Bildquelle: Daniel Zuppinger.
-
Bild 3 von 5. Per maletgs da lufs sto el viagiar: In temp aveva l'Argovian montà sias traplas fotograficas en Glaruna. Bildquelle: Daniel Zuppinger.
-
Bild 4 von 5. En l'Argovia vegnan adina puspè vulps davant la camera, sco qua las duas vulps giuvnas. Bildquelle: Daniel Zuppinger.
-
Bild 5 von 5. L'um davos las fotografias: Daniel Zuppinger dal chantun Argovia. L'um da 66 onns è fotograf da hobi ed ha fotografà ina pluna animals. Bildquelle: SRF.
El è informaticher da professiun, ma avess atgnamain vulì daventar zoolog. Daniel Zuppinger (66) è in fotograf amatur e fotografescha dapi sia giuventetgna animals selvadis. Entant è el pensiunà. Per las fotografias construescha el traplas fotograficas cun sensurs fatgs sez. Il resultat: Maletgs magics d'animals, davos ils quals stattan blera planisaziun e spassegiadas. Mintgatant datti surpraisas.
Dapi var otg onns cumbinescha Zuppinger ses savair d'informatica cun ses hobby, il fotografar. Per las registraziuns dovra el cameras second-hand e flashs. Ils apparats èn equipads cun in sensor che reagescha sin chalur. Er quels construescha Zuppinger sez. Il savair d'electronica ha el emprendì sez.
En viadi en il guaud sper Niederrohrdorf AG mussa el sin in crap surtratg cun mistgel. La camera è installada sin nivel dal plaunterren: «Fotografias ordinarias èn adina fatgas ord l'autezza da nos egls. L'animal è però sut, betg sura. L'angul è uschia bler pli interessant.»
Actualmain ha Zuppinger otg traplas fotograficas en funcziun. I dovra dus dis entirs, fin ch'el ha midà tar tuts las batterias e las cartas da chip cun las registraziuns.
Il lieu resta secret
En il guaudargovian spetga Zuppinger che chavriels, vulps, tais u martras – forsa ina giada in pulaider – giaian en la trapla fotografica. Per maletgs da lufs-tscherver, lufs u giats selvadis sto el ir pli lunsch, en il Giura u en Glaruna. Nua exactamain che las cameras èn, na tradescha el betg. Secret professiunal.
Per visitar las traplas dovri per il solit ina spassegiada da mes'ura. En il Giura èn gartegiadas ad el pliras fotografias nunusitadas, inclusivamain surpraisas: «Jau hai tschiffà en il Giura da l'Argovia in aracun. Quels èn per regla en viadi sper auas, ma là era el sin il crest ed è ì en la trapla fotografica», sa legra Zuppinger.
Savens saja mo ina buna fotografia tranter 200. Mintgatant tschiffa el bain l'animal gist, ma la fotografia na correspunda betg: «Dacurt avev'jau il luf-tscherver en il Giura sin il maletg, ma l'object era plain naiv. Sbagls tutgan tiers.»
Durant dus onns aveva el en il chantun da Glaruna en funcziun ina camera per fotografar il luf. Quai è reussì ad el trais giadas. L'emprima giada era dentant la linsa plaina da vapur e la segunda giada era be mez il luf da vesair. La terza giada hai lura dà la fotografia giavischada.
Contact cun selviculturs e chatschaders
L'Argovian è en stretg contact cun selviculturs e chatschaders. En emprima lingia gida il contact ad evitar conflicts. Savens mussian ils experts ad el dentant era, nua ch'ils animals passan. Sco engraziament per il sustegn trametta Zuppinger als chatschaders e selviculturs mintgamai ils pli bels maletgs.
Il pli grond plaschair hajan quels, sch'in luf-tscherver giaja en la trapla fotografica. «Els survegnan lura da la Confederaziun ina summa, perquai ch'els pon cumprovar ch'in luf-tscherver è en lur revier», raquinta il fotograf d'animals selvadis cun in surrir.
Siemi d'in maletg d'in schacal mellen
Blers animals selvadis ha Zuppinger gia pudì tschiffar cun sia tecnica da fotografar. Gugent avess el era ina giada fotografà in chaun-vulp u in schacal mellen.
In tal è vegnì vis a distanza da mo var 10 kilometers da ses lieu da domicil Niederrohrdorf. «Il schacal mellen n'è anc betg sa mussà fitg cooperativ: Ina fotografia dad el fiss ina enorma casualitad. El è fitg rar.» Fin ch'igl è uschè lunsch, fotografescha l'Argovian en la vischinanza da sia patria vinavant vulps, lufs-tscherver e giats selvadis.