La vischnanca da Falera ha survegnì adina dapli annunzias da la populaziun ch’igl haja vulps en il vitg, uschia Norbert Good, il president communal da Falera. Cun in fegl sgulant en las chasadas ha la vischnanca vulì sensibilisar la glieud, co ella duai sa cuntegnair. Tge che munta:
- Betg dar da magliar als animals.
- Cuvrir ils cumposts.
- Betg laschar enturn satgs da rument.
- Sche pussaivel pavlar ils animals da chasa endadens.
- Spaventar las vulps ch’èn en il conturn da la chasa per che las vulps mantegnan la tema natirala envers ils carstgauns.
Quest pass ha la vischnanca fatg en collavuraziun cun il guardiaselvaschina. Per il mument hajan las vulps bunas relaziuns da viver e la populaziun saja creschida, manegia il guardiaselvaschina, Gieri Derungs. Las vulps sa sentan bain da la vart sulegliva, perquai ch’igl ha là bleras mieurs, il nutriment principal da vulps. Nua ch’igl haja glieud dettia er in zic da magliar. Vinavant sajan las chasas da segundas abitaziuns che n’èn betg occupadas l’entir onn, interessantas per ils animals. I possia avair structuras cun ierts e prads betg segads, quai procuria era per dapli mieurs.
Pli gronds ristgs pervia da la transmissiun da malsognas da la vulp sin animals da chasa u schizunt sin carstgauns, na vesa il survegliader da chatscha per il mument dentant betg.