Tenor l'Uffizi da chatscha chantunal è vegnì filmà la fin da november in portg selvadi masculin a Zernez sin bunamain 1800 meters sur mar. En l'Engiadina è quai ina premiera. Il guardiaselvaschina Guolf Denoth da Zernez manegia ch'i saja bain pussaivel che portgs selvadis hajan traversà l’Engiadina gia pli baud, senza ch'insatgi haja badà insatge. Ils davos onns haja dà in grond boom da cameras d’observaziun da selvaschina ed uschia ves’ins ussa chaussas novas.
Ina visita che va puspè vinavant
Expertas ed experts partan dal fatg che quest visitader solitari na vegnia però betg a restar. L'Engiadina cun ses clima criv e cun la mancanza da nutriment adattà n'è betg in spazi da viver favuraivel per ils portgs selvadis. Tenor Guolf Denoth n'han ins vis dapi la fin da november nagins fastizs pli dal portg selvadi. El presuma ch'il giuven portg haja cuntinuà ses viadi vers il Tirol dal Sid u l’Austria.
Populaziun en las valladas dal sid
Las circumstanzas da viver èn perencunter bunas en las valladas dal sid. Uschia ha RTR rapportà il 2022 che la populaziun da portgs selvadis crescha en il Puschlav e la Mesolcina e chaschuna er donns. Plinavant pon ils portgs er derasar malsognas.
