Tgi che erta milliuns duai pajar dapli taglia. Quai pretenda l'iniziativa per il futur ch'ils Giuvens socialists svizzers han inoltrà. Ils daners che vegnan uschia ensemen duain vegnir duvrads per cumbatter las consequenzas da la midada dal clima.
Per il cusseglier naziunal socialdemocrat Jon Pult è l'iniziativa la dretga via. Studis mussian che persunas ritgas vivian bler pli fitg sin donn e cust da l’ambient che la populaziun normala. Ina taglia sin l’ierta, sco quai che l'iniziativa veglia, saja perquai absolutamain giustifitgada.
Cun quai che nus vegnin a stuair far immensas investiziuns en la transfurmaziun ecologica da nossa societad e da nossa economia, èsi gist che quels pajan che pon sa prestar e che fan era dapli problems.
- abita a Cuira
- naschì 1984
- maridà
- cussegliader da strategia e communicaziun
- deputà dal Cussegl grond 2010-2018
- dapi 2019 cusseglier naziunal
- president da la cumissiun per traffic e telecommunicaziun
L'iniziativa da la JUSO pertutga iertas e donaziuns da dapli che 50 milliuns francs. Sin la facultad che surpassa quella summa da taglia libra duain ils ertavels pajar ina taglia da 50%. Erta ina persuna pia 100 milliuns francs sto ella dar giu 25 milliuns francs, dus terzs en la cassa da la Confederaziun, in terz al chantun.
Che las persunas bainstantas èn propi uschè responsablas per la crisa da clima dubita la cussegliera naziunala liberaldemocratica Anna Giacometti. Responsabels sajan nus tuts, era quels che sgolian en vacanzas, giajan cun auto u hajan a chasa anc in stgaudament d'ieli.
Qua sa tracti da glieud fitg ritga, che han per part investì lur daners en la firma da famiglia, ch'ins vul prender ils daners. Tut tenor na possian questas interpresas da famiglia gnanc pli exister, perquai ch'ils daners èn investids. E lura stuessan ils impressaris vender la firma per pajar la taglia.
- abita a Stampa
- naschida 1961
- dapi 2019 cussegliera naziunala
- commembra da la cumissiun da redacziun
- commembra da la cumissiun da finanzas
- commembra da la delegaziun per las relaziuns cun il parlament talian
- vicepresidenta da la PLD Engiadin'Ota - Bregaglia
I na saja era betg uschia che la Svizra na fetschia nagut cunter la crisa da clima. Anzi.
Nus avain ina lescha da CO2, nus avain approvà ina lescha da clima ed innovaziun ch’è ussa en vigur. La clera finamira è netto nulla enfin il 2050. La Confederaziun investescha gia oz dapli che 2 milliardas francs per la protecziun dal clima ed en il sectur da l’energia. Vitiers vegnan tut las contribuziuns ch’ils chantuns decidan e tut las mesiras che las interpresas realiseschan.
Jon Pult na lascha betg valair quai.
Quai n’è betg correct. Sch’ins guarda las glistas da rangaziun internaziunalas dals pajais che sa stentan per il clima, lura essan nus tranter ils emprims trenta e betg en ils top diesch. Sco pli ritg pajais dal mund munta quai che nus na faschain betg avunda.
I dovri dapli daners per cumbatter las consequenzas da la crisa da clima. Ultra da quai s’avria la forsch tranter quellas paucas persunas che vegnan adina pli ritgas e tut tschellas persunas che han adina pli pauc. Sper l'ambient e clima profitass perquai era la democrazia dad in gea a l'iniziativa e Pult persvas.
Mo enstagl da dapli daners per mesiras cunter la crisa da clima pudessi in gea a l'iniziativa perfin manar al cuntrari, avertescha Anna Giacometti. Ils tschintg pertschient pli bainstants da la populaziun pajan circa 2/3 da l'entira taglia federala directa. E gist quellas persunas sajan lura pertutgadas da la nova taglia d'ierta da la JUSO.
E quellas persunas emigrassan, anc cura ch’els èn en vita, per betg stuair pajar quella taglia d’ierta e pajassan lura era damain taglia. A la fin avessan nus damain entradas da taglia ed era nagina taglia d’ierta.
Quai problem possian ins schliar cun dir gea ad ina da las cuntrapropostas che sajan sin maisa, respunda Jon Pult. Quellas èn per part main severas e pretendan per exempel ina taglia d'ierta da 25% ni 1% sin la summa d'ierta che surpassa 50 milliuns francs. Ils arguments dals adversaris na persvadian perquai betg.
Vul'ins ina schliaziun per il problem fundamental ch’ins dovra daners per la crisa da clima e betg avair quellas grondas differenzas tranter ils super-ritgs ed il rest da la populaziun, lura pon ins era schliar il problem da las interpresas da famiglia. Sch’ins na vul far nagut chattan ins era stgisas marschas per na far nagut.
En il Cussegl naziunal vegn Pult dentant ad avair grev da persvader ina maioritad. Las partidas burgaisas ensemen cun las organisaziuns da l'economia han gia l'onn passà lantschà lur campagna cunter l'iniziativa.