Ina taglia da 50% duaja vegnir imponida sin iertas sur 50 milliuns francs. Pertutgads da questa taglia fissan radund 2'000 persunas. Tenor Jansen profitescha cunzunt questa pitschna minoritad da l’explotaziun dal planet. Ils daners da taglia supplementars duain lura er vegnir impundids per cumbatter la midada dal clima.
L'iniziativa duai vegnir deliberada dumengia a la radunanza da delegadas e delegads. Il start vegniss lura probablamain ad esser l'atun. L'iniziativa na pertutgia nagins manaschis pitschens u mesauns, KMU e n'er nagins fragliuns ch'ertan per exempel ina chasa, ha sincerà Jansen che chala suenter trais onns sco presidenta da la JUSO. Prest 100 milliardas francs vegnian mintg'onn ertads da persunas che n'hajan facticamain fatg nagut persuenter.
Nus vivain facticamain en ina nova societad aristocratica.
Avant set onns ha il suveran svizzer refusà la «Refurma da la taglia sin l'ierta» cun passa 70%. Tut ils chantuns han refusà la refurma. Cun l'iniziativa «Imponer taglia sin ierta da milliuns per nossa AVS», avevan PEV, PS, Verda e l'Uniun sindicala svizra pretendì ina taglia naziunala sin ierta da 20%.
