Il parlament schlucca las restricziuns da construcziun en vischnancas cun bleras segundas abitaziuns (lescha da segundas abitaziuns). Ins duai pudair stgarpar giu, bajegiar da nov, sanar ed engrondir fin in tschert punct chasas, ch'èn vegnidas construidas avant il mars 2012 ed utilisar quellas senza restricziuns.
En il futur duai per exempel esser lubì da stgarpar giu in bajetg vegl, engrondir quel per 30% da la surfatscha e construir il bajetg nov insanua auter sin la parcella. Las novas abitaziuns n'èn lura betg pli suttamessas a la lescha davart las abitaziuns secundaras.
Martin Candinas vul gidar als indigens
Per Martin Candinas ch'ha lantschà l'iniziativa parlamentara, dat quai la pussaivladad ad indigens da renovar e bajegiar ora chasas existentas. Quellas lavurs possian ils possessurs da las chasas lura finanziar cun agiunscher ina u pliras abitaziuns.
I na saja betg ina soluziun per l'entira situaziun. Là sajan era las vischnancas dumandadas cun las pussaivladads ch'ellas hajan gia oz. Per exempel cun fixar ina quota da segundas abitaziuns u cun ina taxa pli auta sin abitaziuns secundaras per sustegnair emprimas abitaziuns.
L'argumentaziun per la midada
En vischnancas cun passa 20% abitaziuns secundaras dastgan quests edifizis construids avant il mars 2012 vegnir utilisads oz mo limitadamain. La cumissiun per la planisaziun da l’ambient e dal territori dal Cussegl naziunal ha vulì pussibilitar cun il project il svilup en territoris da muntogna.
La lescha davart las abitaziuns secundaras na restrenschia betg mo la construcziun da quellas en lieus nua ch'i dat dapli che 20% da quellas. Ella restrenschia era il diever da bajetgs da dretg vegl ch’han existì gia avant il Gea dal suveran a l'iniziativa. E quai haja per consequenza ch'investiziuns necessarias na rendian betg e ch'entirs bajetgs giajan uschia en muschna.
Cussegl dals chantuns suonda al Cussegl naziunal
Cun 27 cunter 11 vuschs – cunter la veglia da la PS e dals Verds e cun 5 abstenziuns – ha la Chombra pitschna approvà la fatschenta. Lur atgna cumissiun d'ambient aveva proponì da suandar al Cussegl naziunal.
La Chombra gronda aveva approvà il project cunter la veglia da la PS, dals Verds e da la GLP. Ella è pronta per las votaziuns finalas. Dà l'impuls per far las midadas aveva il cusseglier naziunal Martin Candinas cun ina iniziativa parlamentara (AdC/GR).
