Las pendicularas han per il Grischun ina gronda muntada economica. Radund ina mesa milliarda francs valurisaziun datti ad onn entras las interpresas da pendicularas en il Grischun, sco l'organisaziun da la branscha, Pendicularas Grischunas, scriva en ina communicaziun. Il turissem da stad vegnia adina pli impurtant per ellas, uschia ch'i saja da tschertgar novas purschidas. Questa transfurmaziun dovria dentant temp, uschia che la purschida d'enviern stoppia en il fratemp segirar las finanzas da las pendicularas. Quai funcziuna dentant mo cun ina ennavaziun artifiziala. Tge che chaschuna auts custs per las pendicularas, che surpiglian persulas quests custs – era sche l'entira economia da las destinaziuns profiteschia.
Damai che l'entira economia profitescha, saja giustifitgà da discussiunar in partenadi privat-public, di il president da las Pendicularas Grischunas, Martin Hug, en ina communicaziun. Las Pendicularas Grischunas han il venderdi radunanza generala sin il Corvatsch, e preschentan a questa chaschun lur posiziuns ed in studi davart la situaziun, sin incumbensa da l'organisaziun che represchenta 23 manaschis en il Grischun.
Muntada economica
Tenor il studi saja la creaziun da valur en il Grischun tras las pendicularas tar radund ina mesa milliarda francs. Las pendicularas emploieschan 2'500 persunas, e sin via indirecta lavurian anc ina giada radund 1'200 persunas per las pendicularas. Tenor l'autur dal studi da l'EBP Schweiz SA saja la creaziun da valur da las pendicularas uschè auta sco quella da la gastronomia e l'industria chemica. La valurisaziun è s'augmentada en ils davos 20 onn per radund 60%.
Che la branscha saja abla da scuntrar sfidas dal futur, mussia il svilup dals davos onns. Ins haja stuì cumbatter svieutas pli bassas che limitavan las pussaivladads da svilup. Perquai haja la branscha nizzegia sinergias, fatg fusiuns ed augmentà la qualitad da las purschidas tras «Convenience», pia simplifitgà process per la clientella, vegn cità Martin Hug en la communicaziun.
Ils custs da la branscha, quels vegnian cunzunt da l'ennavaziun, la preparaziun da pistas e d'augmentar il confort da pendicularas, sutgeras e runals per ils giasts.
Sfidas per las pendicularas
La pli gronda sfida per las pendicularas en connex cun il manaschi, èn las prescripziuns da las autoritads. Quellas pertutgan l'ambient, la planisaziun locala sco era la tecnica. Tar il martgà vesa il studi tranter auter il svilup da purschidas per l'entir onn sco era la reputaziun dal sport d'enviern sco puncts critics.
La regulaziun statala ed il svilup da models da fatschenta pervi da la midada dal clima èn en general grondas sfidas. Tenor il mainafatschenta da las Pendicularas Grischunas, Marcus Gschwend, sajan ils resultats dal studi in cler pensum per l'organisaziun da la branscha. El crititgescha oravant tut era las tendenzas politicas da centralisar tut. Uschia vegnia augmentà ils sforzs da proteger ils territoris muntagnards, tenor Gschwend oravant tut per quietar la conscienza. En il fratemp cuntinueschia il svilup economic en la Bassa. Quai sminueschia la muntada dal turissem da muntogna.
La perspectiva da visitadras e visitaders
Er davart ils motivs e las disas da visitadras e visitaders dat il studi respostas. En sis regiuns, tranter auter en la Surselva, l'Engiadina ed Alvra/Moesa/Viamala, ha il studi er dumandà mintgamai pliras milli persunas durant il 2022 e 2023. I sa mussà che persunas en la regiun da l'Alvra dovran bler pli pauc las pendicularas la stad (32%). Er datti là dapli persunas che visitan mo durant il di (19%), cumpareglia cun il rest dal Grischun.
Remartgabel è er che las pendicularas èn en la regiun Engiadina e las valladas dal sid pli popularas durant la stad (78%), che durant l'enviern (56%). Vi da las purschidas turisticas stiman ellas en il Grischun cunzunt la pussaivladad da far sport. Er la rait da sendas da viagiar è impurtanta a las persunas, e cunzunt l'experientscha da la natira, schubradad, il ruaus, dentant er l'ecologia da las purschidas.
Midadas en ils gremis
Martin Hug banduna las Pendicularas Grischunas en in onn, e Markus Moser, CEO da Corvatsch-Diavolezza, ha annunzià sia candidatura. Philip Holenstein, CEO da las pendicularas d'Arosa è vegnì reelegì sco vice-president.
En la suprastanza è da nov Christoph Passecker da las pendicularas Savognin. Curdin Caprez da l'Arena Alva e Vidal Schertenleib da Tavau restan. Adrian Jordan da las pendicularas Engiadina San Murezzan represchenta las Pendicularas Grischunas en la suprastanza da las Pendicularas Svizras.