Persunas pensiunadas na survegnan nagina gulivaziun cumplaina da la chareschia per l'AVS quest onn. Suenter il Cussegl naziunal ha er il Cussegl dals chantuns sbittà quest project. La decisiun en la Chombra pitschna è stada stretga – 21 vuschs eran cunter e 20 per la gulivaziun cumplaina. La mesemna ha il Cussegl naziunal renvià d'entrar en in project da realisaziun cun 97 cunter 92 vuschs. L'atun avevan omaduas chombras anc acceptà ina moziun cun questa mira.
2,5% enstagl da 2,8%
Gia il schaner ha la regenza auzà las rentas per 2,5%. Tar la discussiun actuala èsi anc ì per ulteriurs 0,3 puncts procentuals. Quai avess muntà in augment da 5 francs il mais per la renta minimala e 12 francs per la renta maximala. La nova renta fiss vegnida pajada a partir dal fanadur ed er quintada uschia ch'ella avess cumpensà era l'emprima mesadad da l'onn.
