I è uss da gidar a quels che han gia pauc.
Forsa ch'in u l'auter bada gia ch'i restan pli paucs daners en la bursa la fin dal mais. L’inflaziun è per il mument tar 3.5% ed ils pretschs d’electricitad creschan en tut la Svizra. En las proximas emnas vegnan era communitgadas las tariffas per las premias da las cassas da malsauns. Prognosas da Santésuise, l’organisaziun da tetg da las cassas da malsauns, prevesan ch'ils custs creschian per var 10%. Uschia che bleras persunas pudessan vegnir en las stretgas cun pajar tut ils custs. Perquai debattescha il Cussegl naziunal davart las pussaivlas mesiras.
I è da gidar, mabain betg dad exagerar.
Il cussegl ha uss votà per duas mesiras per mantegnair la capacitad da cumpra:
- Retschaviders e retschavidras da l'AVS survegnan l'onn che vegn ina cumpensaziun da chareschia plaina per lur pensiuns. Il Cussegl naziunal ha approvà ina moziun da l'Allianza dal Center cun 99 cunter 92 vuschs
- La Confederaziun augmenta sia contribuziun per la reducziun da las premias da cassas da malsauns per 30%. Il Cussegl naziunal ha approvà ina moziun da la PS cun 97 cunter 95 vuschs.
A curta vista fissi da scursanir las taxas sin ieli e benzin
Tut las cuntrapropostas da la PPS n'han gì nagina schanza en la chombra gronda. Quella era sco il Cussegl federal cunter l'adattaziun da las rentas d'AVS. La PPS aveva proponì da laschar davent ina part da la taglia sin ieli ni benzin per mantegnair la capacitad da cumpra.
Proxim’emna cuntinua la debatta en il Cussegl dals chantuns.
