Products èn daventads pli chars, quai è in fatg. Che quels pretschs auts sajan dentant be in effect da la guerra, pia stretgas da furnir e sancziuns, na crai il survegliader da pretschs da la Svizra betg. La dumonda saja sche las firmas profiteschian nungiustifitgadamain da quels pretsch auts? «Gea», di il survegliader da pretschs da la Svizra, Stefan Meierhans. El observia ina uschenumnada «inflaziun pervi da l'engurdientscha», sco el di envers SRF.
Sch’ils pretschs vegnan augmentads sur l’augment da custs per optimar la marscha, lura vegn discurrì da «Gierflation». E quai han differentas retschertgas mussà [..] ch’ils pretschs èn vegnids augmentads sur l’augment da custs.
Il commerzi en detagl sa dosta
Quella renfatscha, che las fatschentas lessan far dapli gudogn, na constettia betg, di la presidenta da l’Associaziun svizra dal commerzi en detagl, Christa Markwalder envers SRF:
Jau chat quai problematic sch’il survegliader da pretschs metta l’entira economia en il medem truchet e di che tuts augmentian nungiustifitgadamain ils pretschs. La Svizra ha per cletg ina pli bassa inflaziun ch’auters pajais. E perquai ston in qual pretschs era vegnir augmentads.
Era Migros e Coop refusan las renfatschadas e scrivan a SRF:
«Quellas renfatschas èn nunfundadas. Nus refusain ellas. 2022 ha Coop sez purtà ils custs supplementars da 250 milliuns francs e betg dà vinavant quels a las clientas e clients.»
«La marscha da gudogn dal commerzi en detagl è fitg pitschna. 2022 era quella tar la Migros be tar 1,5%. Ina gronda part da la chareschia ha la Migros sezza purtà.»
Il survegliader da pretsch, Stefan Meierhans, vul uss prender quai sut la marella.
La chareschia era l'onn passà tar 2,8%
Senza dubi è che la chareschia è s'augmentada l’onn passà. Tenor l’index naziunal da pretschs da consum era lezza ils onns avant adina sut 1%. Il 2022 era la chareschia dentant bunamain sin 2,8%. Cumpareglià cun la Uniun europeica è quai dentant anc adina bass. Là èn ils pretschs da consum s'augmentads per 10%.
È pia tut gnanc uschè nausch? Betg dal tut – cunzunt gronds è l’augment da pretsch sch'ins guarda sin singuls products. Quai mussa tranter auter ina retschertga da Comparis: Sgular è vegnì radund 35% pli car, electricitad 25%, pischada e grass 20%. I dat dentant era spartas nua ch'ils pretschs èn ids enavos. Per exempel tar medicaments, telecommunicaziun u tar carburants.
Tuttina, per Stefan Meierhans saja temp da reagir. Perquai ha el envidà il settember las organisaziuns e gruppas d’interess ord quai sectur tar in inscunter.
