Mangiativas da basa èn daventadas tenor il servetsch da cumparegliaziun Comparis il mars fin 20% pli charas, cumpareglià cun il mars dal 2022. Uschia han custà per exempel margarina, grass da cuschinar ed ieli 19,9% dapli, zutger 17% e paintg 12,2% dapli. Latg, chaschiel ed ovs han custà il mars 8,5% dapli cumpareglià cun il mars da l'onn passà, quai ha Comparis communitgà mardi en ses index dals pretschs da consuments. Tenor l’index èn ils pretschs per rauba dal mintgadi creschids il mars 2023 en total per 3,5%.
Pretschs auts restan
Auts custs per energia, pavel e ladim sco era sperditas da racolta hajan procurà per pretschs da mangiativas creschids. Quels na vegnian betg a sa reducir en il proxim temp, hai gì num en la communicaziun. Ils pretschs per carburant (-7.4%), per la sanadad (-3,5%) e la telecommunicaziun (-3,4%) èn tenor Comparis perencunter sa reducids.
La pli auta chareschia dals ultims 12 mais han badà pèrs senza uffants sur 65 onns. La rata da chareschia sentida è stada per els tar 3,9%. Las chasadas d'ina persuna sut 65 onns han percunter sentì il pli pauc la chareschia.
