En vista als pretschs che creschan vinavant, sto la protecziun dals consuments vegnir rinforzada. Quai pretenda il survegliader dals pretschs, Stefan Meierhans, en in’intervista cun il «SonntagsBlick». En emprima lingia crititgescha el ferm ils gudogns excessivs che tschertas interpresas fetschian cun augmentar ils pretschs.
Da rinforzar la protecziun dals consuments en Svizra muntia da pudair guardar a las interpresas meglier sin la detta e da pudair intervegnir tar augments dals pretschs betg giustifitgads. Perquai veglia Meierhans manar tras in uschenumnà «inscunter davart la capacitad da cumpra» il settember a Berna. La finamira saja ina maisa radunda da tuttas organisaziuns impurtantas e gruppas d’interess dal sectur.
Chareschia tutga surtut ils paupers
Entant che tschertas interpresas profiteschan surproporziunalmain da la situaziun actuala, e la chareschia surtut ina gronda sfida per persunas cun entradas pitschnas. Ellas sajan adina pli savens en retard cun lur pajaments. Quai resulta d’ina retschertga ch’il «SonntagsBlick» ha fatg tar uffizis da scussiun en pliras citads svizras. Uschia haja Cuira registrà 17% dapli cumonds da pajament l’emprima mesadad da quest onn. A Lucerna schizunt 20%.
En consequenza s’augmentian las dumondas da surpigliar pajaments tar ils posts regiunals da la Caritas. Alarmant saja cunzunt ch’adina dapli persunas basegnusas pajan las mangiativas cun lur carta da credit. Il motiv: Ellas n’hajan nagins daners pli en la bursa e fetschian daivets per pudair cumprar da mangiar, avertescha la Caritas Svizra.
Or da l'archiv:
