Il president da la Conferenza dals uvestgs svizzers Felix Gmür conceda sbagls en connex cun ils cas d'abus sexuals ch'èn vegnids a la glisch l'emna passada. La perspectiva da las unfrendas saja vegnida a la curta a l'entschatta da ses temp sco uvestg, ha Gmür ditg en ina intervista cun la «NZZ am Sonntag». Plinavant stoppian las cundiziuns che regian il mument vegnir messas en dumonda. Il temp saja madir per abolir il celibat . Aifer la societad d'ozendi na vegnia quel betg pli chapì tenor Gmür. El n'haja nagin problem da sa metter avant plevons maridads. Latiers duain er dunnas pudair daventar plevonessas.
Conferenza dals uvestgs vul stgaffir ina dretgira penala
Suenter ils cas d'abus sexual aifer la baselgia catolica, ch'èn vegnids enconuschents l'emna passada , vulan ils uvestgs svizzers ussa stgaffir ina dretgira penala e disciplinara per la baselgia. Sco che la conferenza dals uvestgs communitgescha, veglia ella discutar quella cun ils responsabels en il Vatican.
Autoritads da persecuziun penala duain vegnir en funcziun en mintga cas
Preferenza hajan però vinavant las leschas penalas civilas. Las autoritads da persecuziun penala stoppian er vinavant vegnir en funcziun tar tut ils cas d'abus u auters delicts aifer la baselgia. La dretgira da la baselgia duai però s'occupar supplementarmain cun sancziuns. Ils uvestgs han plinavant decis ulteriuras mesiras immediatas, tranter auter duai il studi da l'Universitad da Turitg, ch'ha revelà ils cas d'abus sexual, cuntinuar fin il 2026. Plinavant duai dar in post da servetsch naziunal per rimnar annunzias da victimas.
