Avats che s’abstegnan, uvestgs che sa stgisan, taglias da baselgia che vegnan messas en dumonda – il studi da l’Universitad da Turitg davart l'abus en la Baselgia catolica ha squassà e squassà anc adina il mund catolic.
Ils 12 da settember èn vegnids publitgads ils resultads da l'emprim studi scientific, ch'è vegnì fatg en Svizra. La fatscha da las organisaziuns catolicas en Svizra, ch'han dà l'incumbensa al studi, è l'uvestg Joseph Maria Bonnemain da Cuira.
1’002 cas èn mo il piz da la muntogna da glatsch
En mo in onn da retschertga en ils archivs episcopals e claustrals ha in team da retschertga scientific savì identifitgar per ils ultims 70 onns 1'002 cas dad abus sexual. Quai din las scienzadas incumbensadas, saja mo il piz da la muntogna da glatsch.
Bleras persunas èn idas cun lur secret en fossa, n’han mai fatg annunzias, en blers cas n’è mai vegnì atgisà, la Baselgia n’ha betg inizià ina procedura – quai vul dir, igl n’ha betg dà actas. Perquai è quai propi mo il piz da la muntogna da glatsch.
-
Bild 1 von 3Legenda: Monika Dommann RTR -
Bild 2 von 3Legenda: Joseph Maria Bonnemain RTR
-
Bild 3 von 3Legenda: Marietta Meier e Monika Dommann RTR
Il studi cuntinuescha: «En tschertga da la furma da la muntogna da glatsch»
Per manar dapli glisch en questas stgiraglias vegn cuntinuà il studi. A partir dals emprims da schaner 2024 han las scienzadas ed ils scienzads 36 mais temp da s’approfundar anc ina giada en ils archivs. Lur intent è cler:
Ina da las lezias impurtantas dal studi vegn ad esser dad ir en tschertga da questa furma da la muntogna da glatsch.
Per pudair fastizar meglier ils documents sa giavischass il team da l’universitad sustegn da persunas pertutgadas. Las perscrutadras ed ils perscrutaders èn cuntanschiblas via quest'adressa: forschung-missbrauch@hist.uzh.ch
Las professuressas Monika Dommann e Marietta Meier vegnan a tematisar il studi, lur lavur e la rapportaziun en chaussa en ina seria da prelecziuns cun ulteriuras persunas dal fatg a l’Universitad da Turitg.