Las premias da las cassas da malsauns creschan ad in crescher. Perquai vul la Partida liberaldemocratica midar il sistem da l’assicuranza da basa. Quai scriva il «SonntagsBlick». Concret pretendia la PLD en ina moziun in nov model d’assicuranza. Tenor quai duaja dar in’alternativa cun premias pli favuraivlas, ma er cun damain prestaziuns.
Tgi che sa decidia per quest model, acceptia voluntarmain deducziuns, per exempel tar medicaments. Sch’i dettia in genericum, na duaja la persuna assicurada n’avair nagin dretg pli sin il preparat original pli char.
Critica da la PS e d'organisaziuns da pazients
La Partida socialdemocratica crititgescha la proposta da la PLD. Cunquai che persunas saunas co-finanzieschian ozendi persunas main saunas, pudessi ina midada da sistem donnegiar quellas. Quai ha ditg la cussegliera naziunala da la PS, Flavia Wasserfallen, envers la gasetta da la dumengia.
Er la mainafatschenta da la Fundaziun Organisaziun dals Pazients, Susanne Gedamke, crititgescha ils plans da la PLD. La proposta cuntrafetschia al princip da solidaritad en il sectur da sanadad.
