L'onn che vegn, vegnan las premias da las cassas da malsauns a s'augmentar en media per 6%. Quai spetga il portal da cumparegliaziun Comparis. Tar singulas cassas vegn l'augment schizunt ad esser 10%.
Senza la reducziun da las reservas sfurzada tras la politica fissan las premias creschidas ils davos onns sulettamain per radund 2,5% l'onn e creschissan er actualmain en quest rom, uschia l'expert Felix Schneuwly en la communicaziun da Comparis.
Custs betg be creschids pervi da corona
Ils custs per la sanadad èn fluctuads extraordinariamain ferm tranter 2021 e 2023. Il motiv saja be per part la pandemia da corona. In augment pli grond dals custs hajan chaschunà custs birocratics pli auts, medicaments bunmartgads che na pon betg vegnir furnids, dapli psicoterapias, la realisaziun da l’iniziativa da tgira sco er dapli persunas malsegiras ch’èn sa laschadas examinar cun malessers diffus.
Var 3% augment en avegnir
El quinta er che la fluctuaziun dals custs vegnia a sa quietar ils proxims onns e che l'augment da las prestaziuns medicinalas da l'assicuranza fundamentala vegnia a sa stabilisar levet sut 3%. Per che mintga variaziun da custs na chaschunia betg er ina variaziun da las premias dovrian las assicuranzas puspè ina reserva che saja sur il minimum legal, uschia Schneuwly vinavant.
