Sin l'autostrada
Da nov vala: gia cur ch'il traffic sin l'autostrada ha mo pli tempo da chaminar, ston ins furmar la giassa da salvament. Cun quella duain ambulanza e pumpiers spert arrivar tras las colonnas.
Sch'in vial sin l'autostrada va a fin ed ins sto midar vial (sch'i dat per exempel or da trais vials dus vials u sch'ins arriva tar in plazzal), vala danovamain il principi dal zip/serranetga. Quai vala er sin las rampas che mainan sin l'autostrada – durant ch'i dat colonnas sin l'autostrada.
Sin l'autostrada èsi uss en singuls cas pussibel da passar da la vart dretga sper in auter auto via. Quai per exempel sch'i dat sin il vial sanester colonnas, da la vart dretga dentant betg. Uschiglio è il surpassar a dretga vinavant scumandà
Reglas per velos
Ina midada datti sin ils passapes. Uffants fin 12 onns pon ir cun il velo sin ils passapes. A partir da 12 onns ston ins dentant vinavant ir giu dal velo e stumplar quel sin il passape.
Tar tschertas amplas datti da nov in signal che mussa in velo ed in paliet mellen. Tar quels signals pon velocipedists storscher a dretga durant che l'ampla mussa anc cotschen. Els ston dentant dar adatg cun far quai. Peduns han vinavant il dretg da precedenza. Uschiglio vala vinavant: cotschen vul dir star airi.
Novas reglas per novizs
Ina nova regla datti per persunas sut 20 onns , che survegnan il permiss dad emprender dad ir cun l'auto: Per quels vala ina fasa d'emprender da 12 mais. Els pon pia far l'examen pir in onn suenter ch'els han survegnì il permiss d'emprender d'ir cun auto.
Per tuttina pudair far l'examen cun 18 onns, pon ins gia cun 17 onns retrair il permiss d'emprender. Questa regla vala be per persunas che dumondan a partir dal 01.01.2021 il permiss d'emprender.
