50 onns dretg da votar per dunnas
Ils 7 da favrer 1971 han ils umens svizzers decis: las dunnas duain er pudair ir a votar. Cun 65,7% dals votants e 17 chantuns ch'han ditg GEA è il resultat stà fitg cler. La Svizra è in dals davos pajais europeics, nua ch'er las dunnas survegnan il dretg da votar.
La discussiun davart il dretg da votar è dentant pli veglia che 50 onns, ed ha cuzzà plirs decennis cun pliras demonstraziuns fin a la votaziun. Per il giubileum spetgan tranter auter exposiziuns, publicaziuns da cudeschs sco er auters projects.
100 onns Club da hockey Tavau
Il 1921 ha Paul Müller fatg or d'in club dad osps e scolas medias il Club da hockey da Tavau. Sco che Paul Müller haja manegià ina giada, saja l'ambiziun stada pli gronda che las abilitads. Cun il temp è il club da Tavau dentant daventà ina squadra da renum naziunal, ch'ha gudagnà las pli bleras giadas la liga naziunala.
Lutga e litteratura
L'emprim grond giubileum da l'onn è ils 5 da schaner – il di, cura che Friedrich Dürrenmatt festivass ses 100avel anniversari. Fans da l'autur da «Der Richter und sein Henker» u da «Die Physiker» pon s'allegrar sin in onn cun intginas represchentaziuns da ses tocs da teater u d'in u l'auter nov cudesch sur dad el.
Il settember spetga anc in highlight sportiv. En l'Appenzell ha lieu ina festa da lutga da giubuleum: 125 onns Uniun federala da lutga. Talas festas da giubileum datti mo mintga 25 onns. Atgnamain fiss ella stada planisada schon il 2020, è dentant vegnida spustada.
Giubileums regiunals
Giubileum ha quest onn er la«Pagina da Surmeir». La gasetta cun var 1'000 abunents festivescha ses 75avel anniversari. A partir da quest onn surpiglia la Fundaziun Medias Rumantschas (FMR) la redacziun da la gasetta.
Vinavant festiveschan differentas uniuns ed occurrenzas in anniversari radund. Tranter auter il bike-marathon en Engiadina (25), la societad da musica a Vignogn (100), l'Uniun chantunala da pumpiers (125) u l'Uniun da medias e medis dal Grischun (200).
