La varianta da corona omicron è uss er en Svizra dominanta. Tenor l'Uffizi federal da sanadad èn entant 55,7% da las novas infecziuns, da quellas cun la nova varianta.
Glindesdi aveva il BAG annunzià entaifer 96 uras, passa 36'000 novas infecziuns cun il coronavirus. Plinavant hai dà 69 ulteriurs mortoris e 345 novas ospitalisaziuns. Las staziuns intensivas èn occupadas per radund 78% e per passa 38% cun pazientas e pazients da Covid-19.
Persunas giuvnas spezialmain pertutgadas
Persunas tranter 20 e 29 onns èn mumentan pertutgadas il pli fitg d'infecziuns cun il coronavirus. La varianta Omicron è entant gia responsabla per passa la mesadad da las infecziuns, sco quai che Patrick Mathys dal BAG ha ditg mardi a la conferenza da medias.
Proximamain pudessi dar 20'000 infecziuns a di. Las infecziuns sa dublegian tranter trais e tschintg dis. Cun quest svilup èsi tenor la presidenta da la taskforce da corona, Tanja Stadler, be pli ina dumonda dal temp fin che omicron è responsabel per tut las infecziuns novas en Svizra. L'exempel tar il Club da hockey da Tavau mussia quant spert ch'il virus sa derasa. Mintgin stoppia ussa ponderar quant contact ch'el u ella dovri propi, uschia il presdient dals medis chantunals Rudolf Hauri. Il mument vegnian 336 pazientas e pazients tractads sin l'intensiva. En singuls ospitals sajan las capacitads entant cuntanschidas.
Triascha be pli ina dumonda dal temp
Sin las staziuns intensivas a Lucerna dastgassan singuls pazients bainbaud betg pli vegnir tractads. La raschun perquai è, che las resursas daventan adina pli stgarsas. La triascha saja perquai previsibla, ha ditg il directur da sanadad Guido Graf. Anc na saja dentant betg uschè lunsch.
La situaziun sin las intensivas daventa però adina pli accuta. Vitiers vegn la derasaziun rasanta dad Omicron. Er collavuraturas e collavuraturs en ils ospitals èn pertutgads. Gia il schaner èsi uschia pussaivel ch'i vegn tar triaschas.
