Tar passa la mesadad da las novas infecziuns hajan ins constatà omicron. Quai ha ditg il medi chantunal Giorgio Merlani envers RSI.
La varianta dominanta èn il Tessin è omicron
La varianta sa derasa fitg svelt. Avant paucs dis dominava anc la varianta delta, uss è quai gia auter. En pli sa mussia che la varianta possia er infectar persunas ch'èn gia vaccinadas u guaridas – en il Tessin dettia clers mussaments. Sch'i dettia mo in singul cas en famiglia, vegnian er ils ulteriurs commembers da famiglia infectads, ha ditg Merlani.
Novas restricziuns en il chantun
Dapi la gievgia èn visitas en ospitals tessinais scumandads. Per visitas en chasas da vegls vala la regla da 2G Plus. Cussadentas e cussedents na dastgan per il mument betg pli bandunar las instituziuns.
En pli ston persunas che n'han betg survegnì ina vaccinaziun da rinfrestgament e han gì contact cun ina persuna infectada ir en quarantina.
