La chareschia en Svizra è per l'emprima giada dapi in mez onn puspè ida lev ensi. L'inflaziun è creschida il settember per 0,1% sin 1,7%. Pia èn las raubas en butias svizras 1,7% pli charas che l'onn passà. I dat dentant grondas differenzas tranter products e servetschs:
- Raubas da l'exteriur èn mo 0,5% pli charas ch'il settember l'onn passà
- Tschains da locaziun ed energia èn 3,2% pli chars ch'il settember l'onn passà
- Raubas da la Svizra èn stads 2,1% pli chars ch'il settember l'onn passà
La davosa giada è l'inflaziun ida ensi il favrer 2023. Là è ella stada sin il pli aut nivel cun 3,4%. L'augment da l'inflaziun pudess cuntinuar ils proxims mais. Per l'ina vegnan vitiers il november ils pli auts tschains da locaziun, per l'autra s'augmentan ils custs d' energia il 2024. Las cifras davart l'inflaziun ha publitgà l'Uffizi federal da statistica.
