L'iniziativa per la libertad e l’integritad corporala da la gruppaziun «Freiheitliche Bewegung Schweiz» ha fatg naufragi. Il suveran da tut ils chantuns ha refusà l'iniziativa.
Be gist bun 26% da las votantas e dals votants ditg Gea a l'iniziativa.
L'iniziativa era gia vegnida lantschada cun pauc sustegn. Tar l'emprima retschertga da la SSR avessan 70% da las participantas e dals participants da la retschertga refusà l'iniziativa. Tar la segunda retschertga era la part da la populaziun che refusescha l'iniziativa creschida sin 75%.
Er il sustegn da las partidas è sa reducì. Be la Partida populara svizra ha sustegnì l'iniziativa, ha cun il temp chattà adina pli paucs aderents per la tematica. Tut tschellas partidas han refusà lur sustegn.
Iniziants na vulan betg pussar
«Jau na sun atgnamain betg dischillus», ha Richard Koller, il cuniniziant da l'iniziativa da libertad ditg en in'emprima reacziun envers SRF. «Tar ina iniziativa dal pievel na pon ins atgnamain perder nagut, mo gudagnar insatge, numnadamain ina nova agiunta da la constituziun. Natiralmain avessan nus per quai gugent il consentiment.»
Vinavant pondereschian els da lantschar anc ina giada questa iniziativa. In'opziun saja da formular pli precis las circumstanzas, in'autra era in'iniziativa parlamentara correspundenta – agiunta il president da la «Freiheitliche Bewegung Schweiz». La campagna saja stada pitschna, quai din Koller sco era il cusseglier naziunal da la PPS Pirmin Schwander. Tenor el na steva la iniziativa betg sisum da la glista da tractandas da la partida.
Cler Na dal Grischun
Il chantun Grischun di cun passa 74% da tuttas vuschs dumbradas cleramain Na a l'iniziativa per la libertad e l’integritad corporala. La participaziun a la votaziun è stada tar 40%.
Grischun: Iniziativa per la libertad ed l'integritad corporala
-
GEA
-
Na
Da las vischnancas grischunas dumbradas fin uss èn tuttas s'exprimidas cunter l'iniziativa per la libertad ed integritad corporala. La pli auta participaziun a la votaziun hai cun passa 60% dà a Tschappina. Las pli bleras vuschs cunter l'iniziativa hai dà ad Urmein, quai cun 89% da la vuschs da las votantas e dals votants.
Quai vuleva l'iniziativa
L'iniziativa ha pretendì che persunas dettian lur consentiment ad intervenziuns en l'integritad corporala u spiertala. Ina persuna che refusa da dar ses consentiment na dastgia ni vegnir chastiada ni dischavantagiada. Gia oz è l'integritad corporala e spiertala part da la constituziun.
