L’augment da pretsch actual saja senza exempel, di l’expert dal martgà d’energia Ulrich Münch. Dapi la liberalisaziun dal martgà da forza electrica dastgan clients gronds che dovran dapli che 100'000 uras kilowatt per onn cumprar il current al martgà liber sin agen risico. Pertutgads èn radund 23'000 interpresas.
Per blers onns avevan questas interpresas profità da pretschs pli bass, ussa ston els sbursar bler dapli. I dat exempels dad interpresas che duain pajar l’onn che vegn 11 giadas dapli che fin ussa.
Difficultads per interpreseas
Tut segund co la situaziun sa sviluppa, possian tschertas firmas vegnir en difficultads, di l’Uniun svizra d'artisanadi e mastergn (SGV).
Fabio Regazzi, president dal SGV e cusseglier naziunal, suttastritga ch’i saja impurtant che ils pretschs returnan sin in nivel normal. Uschiglio pudessi esser che mesiras sco relaschada vegnan necessarias per tschertas interpresas.
Nagina meglieraziun a curta vista, speranza a lunga vista
Tenor Münch resta questa situaziun excepziunala però per ina pezza. «Cun midadas fitg curtas na pon ins plitost betg quintar».
Ma i dettia er buns indizis che il pretsch da forza electrica pudess puspè sa sbassar.
La Germania vegnia gia prest ad avair installà l'infrastructura da gas
independenta da la Russia
. Ed en Frantscha pudessan las ovras atomaras messas giu bainbaud puspè vegnir colliadas cun la rait.
E lura dependa anc, uschè Münch, sche la Svizra ed il rest da l’Europa sajan buns da realisar l’augmentaziun planisada da la producziun d’energia regenerabla.
Or da l'archiv
Er las pendicularas èn confruntadas cun ils pretschs muntads d'energia.
