La nova disposiziun cumplettescha las cumpetenzas da promoziun da la Confederaziun, per ch'ils uffants e giuvenils survegnian access a purschidas da furmaziun talianas e rumantschas ordaifer ils chantuns Tessin e Grischun. Plinavant datti er sustegn per persunas emigradas e lur famiglias, uschia ch’ellas possian vegnir sustegnidas tar l'utilisaziun da lur lingua e per ch'i possia vegnir promovida la basa per emprender la lingua.
La promoziun dal rumantsch e talian en il chantun Grischun resta entant quasi la medema. A disposiziun stattan per ils onns 2025 enfin 2028 en tut 21 milliuns francs. Quai èn 300'000 francs pli pauc che proponì en la consultaziun. Pli paucs daners datti pervia da las mesiras da spargn da la Confederaziun.
Novitad allegraivla per la Lia Rumantscha
I saja in pass impurtant per la promoziun dal rumantsch. Uschia commentescha il vice-secretari general da la Lia Rumantscha Andreas Gabriel la decisiun dal Cussegl federal da midar la lescha uschia che projects rumantschs e talians ordaifer il Grischun vegnan sustegnids finanzialmain da la confederaziun.
Deplorabel saja però ch'i dettia 300'000 francs pli pauc che previs en il sboz dal messadi da cultura.
