Abitaziuns libras èn adina pli raras en las regiuns da muntogna. Uschia er abitaziuns per il persunal che lavura en las regiuns turisticas. Perquai è la Gruppa svizra per las regiuns da muntogna s’inscuntrada per discutar davart la problematica e preschentar inputs per soluziuns.
Tgi che porscha abitaziuns ha era pli grondas schanzas da survegnir il persunal qualifitgà, di Thomas Egger, il directur da la Gruppa svizra per las regiuns da muntogna (SAB).
Tar in discurs da persunal n'è betg pli la dumonda suenter la paja la decisiva, mabain sch’ins metta a disposiziun in'abitaziun.
Sch’ins n’haja betg a disposiziun in’abitaziun cuntinueschia il persunal tenor Thomas Egger la tschertga suenter lavur. Quel saja numnadamain dumandà pervi da la mancanza. Perquai vesa Thomas Egger sco responsabilitad principala da metter a disposiziun abitaziuns per persunal tar las interpraisas turisticas.
La situaziun per abitaziuns libras saja vegnida pli acuta ils ultims trais onns. Tenor la SAB saja la disponibilitad en las regiuns da muntogna turisticas per sa sminuida per la mitad dad 1.5% sin 0.75%.
A la tschertga d’ideas
Ad ina dieta a Berna han differents turistichers preschentà soluziuns pussiblas, uschia per exempel l'Hotel Belvedere a Scuol. L'hotelier Kurt Baumgartner ha preschentà las chasas da persunal ch'el ha fabritgà u renovà. Da pudair acquistar terrain e fabritgar abitaziuns arrivan dentant be «ils gronds». Pli pitschna che l'interpresa saja e pli difficil ch’il problem d'abitaziuns vegn, decleran Kurt Baumgartner da l'Hotel Belvedere sco era Thomas Egger, il directur da l'organisaziun SAB.
Interpresas pli pitschnas duain sa metter ensemen e cumprar u fabritgar abitaziuns da persunal.
Igl èn ideas diversas ch’èn vegnidas barattadas durant tut il di. La tematica è cumplexa. Dasper la dumonda creschenta suenter las abitaziuns vegnan anc auters facturs sco la planisaziun dal territori, las segundas abitaziuns u Airbnb. Latiers vegn ch'i na dat betg mo 1 recept per il problem. Mintga situaziun en mintga vischnanca sa preschentia per part fitg different. Uschia sajan era las vischnancas dumandadas, di Egger.
I dovra concepts individuals.
Preschent a la dieta a Berna è era stada la vischnanca da Sumvitg. Il president Patrick Schaniel ha preschentà là l’exempel da sia vischnanca. Cun far la planisaziun locala hajan ins vis potenzial per abitaziuns da persunal a Rabius. Il plan è, che la vischnanca cumpria il terren e dettia giu il dretg da fabrica. Anc avert è la dumonda tgi che duai investir. Idealmain, di Patrick Schaniel, fissan quai las interpresas localas.
La SAB ha vulì mussar cun la dieta che i na sa duai betg pli spetgar cun agir e che i dat soluziuns. Ins duai esser innovativs sch’ins vul il persunal qualifitgà era en avegnir.