Dependenza, miseria e criminalitad – Cuira vuless far frunt als problems da la scena da drogas averta cun in local da consum. Actualmain è quest local planisà a l'ur dal Welschdörfli. Differentas persunas ch'abitan en la vischinanza teman malruaus, delicts e mulestas. Opposiziun hai dà era en autras citads. Ma betg ussa, mabain avant 30 onns.
A Soloturn per exempel han vischins cumbattì in tal local ils onns novanta fin davant il Tribunal federal. Oz però na bitta quest local betg pli grondas undas. Quai ha mussà la visita da RTR en il local da consum amez la citad nova.
-
Bild 1 von 5Legenda: RTR -
Bild 2 von 5Legenda: RTR
-
Bild 3 von 5Legenda: RTR
-
Bild 4 von 5Legenda: RTR
-
Bild 5 von 5Legenda: RTR
Dapi 15 onns è il local en la medema giassa. Avert è el adina da las 11:30 enfin las 18:30. Var 100 persunas dependentas a di vegnan qua a consumar lur drogas illegalas. Ellas survegnan era cussegliaziun, accumpagnament ed agid en situaziuns d'urgenza. I na giaja betg per cumbatter la dependenza, mabain per minimar ils donns. Quai di Karin Stoop, la manadra da l'instituziun responsabla per il manaschi dal local da consum.
La dependenza è ina malsogna cronica, e greva da guarir. Nus stuain quintar che questas persunas èn dependentas per vita duranta. Il local da consum tutga qua tar il tractament.
Las persunas responsablas per il local da consum a Soloturn collavuran stretgamain cun la polizia da la citad. Il cumandant Walter Lüdi discurra d'ina purschida indispensabla.
Nus constatain che la scena da drogas n'è betg visibla en il spazi public durant il temps d'avertura dal local.
E dapi ch'ins haja installà in servetsch da segirtad dettia era be paucas reclamaziuns dals vischins.
Vischins s'arranschan
En il rom d'ina pitschna retschertga betg represchentativa che RTR ha fatg en ils conturns dal local da consum a Soloturn di la glieud, ch'i dettia qua e là in zic canera e mintgatant conflicts tranter las persunas dependentas. Ma grazia al sustegn dal servetsch da segirezza vegnian quels schliads spert.
Tema n'hajan els betg, din plirs affarists e la clientella vegnia tuttina en las butias ni en ils restaurants. Ins saja oramai s'arranschà e cunquai ch'il local da consum a Soloturn sa chattia dapi 15 onns en il medem lieu, dettia bain anc mintgatant in u l'auter conflict, ma nagina gronda canera pli.