In rapport dal Blick ha dà schlantsch a la discussiun davart la consegna controllada da crack u freebase – pia dar giu quellas drogas a persunas ch'han da basegn questa substanza en in rom controllà. Il suprastant da la citad da Cuira, Patrik Degiacomi, relativescha quest rapport. El declera, che la citad haja mussà interess vi d'in project da pilot da la Confederaziun. Il sistem datti actualmain gia, dentant cun heroin.
Crack n'è betg heroin
En l'ambulatori «Neumühle» a Cuira vegn gia dà giu heroin a moda controllada. La manadra, Margreth Meier, declera ch’ins stoppia far la differenza tranter las singulas substanzas. Heroin saja numnadamain ina sort opioid. Tar quel funcziunia bain da dar giu a moda controllada cunquai che las persunas sajan suenter ina dosa saduladas per in entir di e possian prender part a moda normala al mintgadi.
Auter vegnia quai ad esser tar crack u freebase. Omaduas substanzas vegnan producidas chemicamain sin basa da cocain e fimadas en ina pipa. Tenor la manadra fan questas substanzas vegnir engurd. Il «high» che las persunas sentan pervi da crack u freebase passia spert puspè e las persunas hajan lura svelt puspè in ferm desideri da consumar. Quai fetschia grev da dar giu questas substanzas a moda controllada, declera Meier.
Nagina colliaziun al local da consum
Margreth Meier vesa ina schanza da profitar da las experientschas che la citad vegn a far cun il local da consum. Ins vegnia a vesair là quantas persunas che consumeschian crack u freebase e quantas giadas ch’els consumeschian las substanzas. La manadra da la «Neumühle» fa cler, che quest local da consum sto avair prioritad e pir suenter possian ins discurrer da la consegna controllada. Quai vesa era Patrik Degiacomi uschia.
La consegna controllada da crack u freebase saja fin uss in idea ed anc betg in plan concret u actual. Sco emprim stoppia era, tenor Patrik Degiacomi, vegnir il local da consum. Là na dettia nagina colliaziun cun la consegna controllada. Al local da consum na vegnan pia naginas drogas dadas giu. Las persunas stoppian purtar sezzas las substanzas ch’ellas veglian consumar. En il futur pudessi dar ina colliaziun tranter ils dus projects, quai saja dentant anc lunsch davent.
Or da l'archiv:
