Il parlament a Berna vul ina cumissiun d'inquisiziun parlamentara (PUK) – che prenda sut la marella ils schabetgs cura che la banca UBS a surpiglià a moda urgenta la Credit Suisse. La gievgia ha il Cussegl dals chantuns tratg questa decisiun cun ina gronda maioritad da 37 cunter 5 vuschs. La mesemna aveva il Cussegl naziunal decidì unanimamain, da laschar intercurir quests schabetgs.
Las cumissiuns da gestiun d’omaduas chombras, ed ils biros dal Cussegl naziunal e dal Cussegl dals chantuns avevan gia avant beneventà ina cumissiun d’inquisiziun davart la crisa da la CS. Il Cussegl federal vul sustegnair cumplainamain il parlament en questa lavur, ha el laschà savair l’emna passada.
Il presidi da la cumissiun – per Jon Pult nagin tema
Tschertas partidas han nizzegià la debatta per sa posiziunar bain, dentant senza laschar udir direct nums. Ils parlamentaris grischuns han tuts ditg envers RTR da betg avair interess per il post da presidi.
Dar schlantsch a la carriera politica pudess la PUK dentant al socialdemocrat Jon Pult. El vala numnadamain sco candidat pussaivel sco schef da fracziun da la PS. Quai damai che Roger Nordmann dat giu quest post, e candidescha per il presidi da la PUK.
Dasper Roger Nordmann è la cussegliera dals chantuns Maja Graf dals verds ina candidata. Sia partida la ha gia nominà per la PUK. Nagin interess da timunar la cumissiun han la PLD e la PPS. Resta anc l’Allianza dal Center, e lezza ha il mument las meglras schanzas sin il presidi. Ella ha dentant da magunar la renunzia dal cusseglier dals chantuns Daniel Fässler. Nums che curseschan uss en la partida èn il schef da fracziun Philipp Matthias Bregy, sco er ils dus represchentants en il Cussegl dals chantuns Isabelle Chassot ed Erich Ettlin.
Tut ils aspects federals dals davos onns
L’inquisiziun parlamentara duai sa fatschentar cun l’agir dal Cussegl federal, da l’administraziun federala, e d’auters gremis che han incumbensas federalas – quai adina en vista als schabetgs concernent la Credit Suisse e sia surpigliada tras la UBS. L’inquisiziun na duai betg sa limitar sin il temp curt avant la surpigliada d’urgenza, mabain era sa deditgar al svilup dals davos onns concernent la CS.
