Ina gronda part da la populaziun s'identifitgescha cun la Svizra, in terz è da l'opiniun d'esser totalmain svizzer. En la part taliana da la Svizra èn schizunt passa la mesadad (54%) da tuts da quella opiniun. Plinavant sa sentan ils vegls pli fitg totalmain sco Svizzers (43%), che las persunas tranter 16 e 39 onns (23%).
Tar las valurs sa mussa in zic in auter maletg. Bain èn dus terzs da l'opiniun che lur valurs vegnan partidas dal rest da la Svizra, dentant è era in terz da l'avis ch'els hajan valurs ch'auters na partian betg. Il pli marcant è quai tar persunas giuvnas (37%) e quellas cun pli pauc che 3'000 francs entradas (42%).
In'ulteriura dumonda da la retschertga è stada, tge ch'è impurtant per l'identitad svizra – tge qualitads sto ina persuna avair per esser svizra. E plinavant era tge caracteristica definescha la Svizra sco pajais.
Per quasi tuts e tuttas èsi impurtant da respectar las instituziuns svizras, discurrer ina lingua naziunala e da dar quità da la cuntrada e natira svizra. Il terz punct è in zic pli impurtant per dunnas (68%) che per umens (59%).
Ad ils blers n'èsi betg impurtant sch'insatgi è naschì en Svizra u betg. Tar las persunas da 16 fin 39 onns èn 22% da l'opiniun che quai n'è insumma betg impurtant – tar persunas sur 65 onns èn quai be 13%. Ina gronda differenza datti era tranter las regiuns linguisticas. Uschia è la Svizra sco lieu da naschientscha impurtant per mintga terz Tessinais, ma be per mintga dieschavel Romand. Per ils blers Rumantschs èsi «plitost betg impurtant» d'esser naschì en Svizra (62%).
Central per l'identitad svizra è per passa 4/5 la democrazia directa. Ensemen cun quels e quellas ch'èn plitost d'accord, vegnan ins schizunt sin 98%. Da quell'opiniun èn propi tuts, independent da vegliadetgna, schlattaina u sch'ins ha in pass svizzer u betg. Era impurtant è l'istorgia svizra, senza esser stà part d'ina monarchia, la muntogna e la diversitad linguistica.
Interessant è che la neutralitad tar conflicts armads n'ha betg uschè ina gronda muntada tar la populaziun, sco quai che l'intensitad da la discussiun politica dat l'impressiun. Bain è ina maioritad da quest'opiniun, dentant èsi be per 31% fitg impurtant.
Che la Svizra saja il meglier pajais per viver sustegna era ina gronda maioritad. Là en ils Romands e Romandas pli scepticas, 19% èn cumplainamain d'accord, cumpareglià cun la Svizra tudestga cun 31%.
