Quell’experientscha avais vus segir era gia fatg ina giada. Vus visitais ina bella citad, e cura che vus giais a guardar la catedrala è almain ina part dal bajetg zuppada davos in grond palancà. Nagut cun far bellas fotos. Tgi che visita quest onn la catedrala da Friburg ha dentant cletg. Nagin plazzal zuppenta la fatschada. Maiestusamain s’auza il clutger sur ils tetgs da la citad veglia.
Che uschia ina catedrala è dentant la gronda part dal temp in plazzal perpeten, quai sa François Guex, l’anteriur tgirader da monuments da Friburg, fitg bain. El cumpareglia sia catedrala cun ina buna patissaria.
La catedrala è sco ina gronda sfegliada cun crema.
«Ella è ina gronda sfegliada cun crema. Ina stresa sin l’autra. I dat bleras autras baselgias, per exempel la baselgia da la claustra da Nossadunnaun/Einsiedeln nua ch’ins ha in di decidì da betg pli vulair ina baselgia dal temp medieval mabain ina baselgia barocca. Quai n’è betg capità a Friburg.»
Quai ves’ins era endadens la catedrala. Qua hai blers objects da differentas epocas. Per exempel ils bancs en il chor da la catedrala, lez èn dal 16. tschientaner, l’orgla dal 19. ed il giatter che sparta il chor da la nav da la catedrala è vegnì fravegià il 15. tschientaner. Ed i vegn ditg che quai saja il pli bel giatter da quai temp ch’existia anc, raquinta François Guex.
«La part sisum sumeglia a frastgas cun spinas. Uschia n’èsi segiramain betg pussaivel da surventscher quai giatter. Quai sto esser uschia perquai ch’i dat en il chor bleras reliquias.»
Prest 750 onns veglia
L’istoricher d’art ha accumpagnà durant 15 onns la restauraziun da la catedrala. Dapi ch’el è pensiunà giauda el da raquintar a persunas interessadas l’istorgia da la catedrala da Friburg. Per exempel co l’anteriura baselgia è propi daventada ina catedrala. Ina premissa saja stada la grondezza.
«Quai è stà in grond project da construcziun davent il 1283 ed ils onns proxims. In project fitg ambizius. La citad da Friburg ha da lez temp gì circa 5’500 abitants. Mo ils responsabels han gia bajegia sco per ina catedrala.»
Ils respunsabels han bajegià sco per ina catedrala.
In cler mussament ch’ils da Friburg han gì gronds plans cun lur baselgia saja il clutger, di François Guex e mussa en direcziun da la tur che mesira 76 meters.
«La tur è vegnida finida il 1490. Ella è ina da las paucas turs ch’è propi vegnida terminada anc durant il temp medieval. Il clutger dal münster da Berna è per exempel pir vegnì construì a fin tenor ils plans la fin dal 19. tschientaner.»
Ina segunda premissa impurtanta per daventar ina catedrala è ch’in uvestg sto avair là ses sez uffizial. Han ils Friburgais e las Friburgaisas gia sminà il 13. tschientaner ch'els vegnian ad avair in di in agen uvestg? Pauc probabel, di François Guex. L’uvestg da lez temp era anc da chasa a Losanna.
Festivitads 100 onns catedrala Friburg
Refurmaziun ha purtà l'uvestg a Friburg
Mo cun la refurmaziun èn Genevra e Losanna daventadas refurmadas e l’uvestg ha stuì bandunar sia catedrala a Losanna. Friburg percunter è restada catolic ed uschia davent dal 17. tschientaner lura era il lieu da refugi ideal per l’uvestg. Durant plirs onns è la citad da patrizians a la Saane stada il sez inuffizial da l’uvestg da Losanna.
«Mo la baselgia n’era anc adina betg ina catedrala. E lura, avant circa 100 onns han ins gì il sentiment ch’i saja ussa da far urden, quai cun il permiss dal Papa.»
-
Bild 1 von 3Legenda: Uvestg Marius Besson, l'emprim uvestg da la catedrala Friburg. (1940) Keystone
-
Bild 2 von 3Legenda: Vista sin la catedrala ed la citad veglia da Friburg. (1954) Keystone
-
Bild 3 von 3Legenda: Il 1984 ha Papa Gion Paul II visità Friburg e la catedrala durant ses viadi tras la Svizra. Keystone
Ed uschia è la baselgia da Friburg daventada il 1924 la catedrala San Niclà, il sez uffizial da l’uvestg da Losanna, Genevra ed Friburg. Sis uvestgs dumbr’ins enfin oz, e cun l’uvestg actual, Charles Morerod, è per l’emprima giada era in Friburgais a la testa da l’uvestgieu.