En Svizra saja pussaivel da realisar gieus olimpics e paralimpics d'enviern a partir dal 2030. La Svizra haja il potenzial, la savida ed il sustegn da la populaziun per realisar quai. A questa conclusiun vegn il studi da realisabladad da Swiss Olympic, da las associaziuns da sport d'enviern olimpicas e da Swiss Paralimpic. Enfin ussa eran quai citads u regiuns ch'han realisà gieus olimpics e paralimpics. Da nov lubescha il Comité olimpic internaziunal (IOC) en il senn da la persistenza era candidaturas che vulan realisar ils gieus decentralisà en l'entir pajais.
Sentiments maschadads en la politica grischuna
Che gieus olimpics pudessan turnar en Svizra procura per differentas reacziuns en il Grischun. Tenor il cusseglier guvernativ Marcus Caduff saja bun ch'ins veglia realisar ils gieus olimpics a moda decentrala e persistenta, sur l'entira Svizra. L’infrastructura e las cumpetenzas ch’i dovra sajan avant maun. Surtut persvadia ch’i saja decentral e ch’ins bajegia sin resursas gia existentas. Quai che saja anc da sclerir èn dumondas da traffic e custs da segirtad e sco quels vegnian finanziads.
Da l'autra vart è sceptics il president da la partida socialdemocratica grischuna, Andri Perl. I vesia ora interessant sin l’emprima egliada. La partida stettia dentant ina observatura sceptica en il svilup da questa chaussa. Per Andri Perl na cumpenseschia in studi represchentativ betg che la populaziun grischuna haja gia refusà ils projects olimpics duas giadas l’onn 2013 e 2017.
Po vegnir realisà sin infrastructura existenta
Il studi mussa plinavant ch'ils gieus d'enviern en Svizra pudessan vegnir realisads cumplettamain sin l'infrastructura existenta. Davent dal Vad sur il Vallais e Turitg enfin il Grischun. Uschia fiss quai pli persistent ed ins possia spargnar blers daners.
Tenor il plan da lavur «Venue» èn prevesidas concurrenzas en 12 lieus en tuttas quatter regiuns linguisticas. Las vischnancas ed ils chantuns dumandads han gia ditg ch'i hajan interess. La festa d’avertura fiss planisada a Losanna, la festa finala a Berna.
1,5 milliardas francs entradas pudessan vegnir generadas
Sa basond sin il plan da «Venue» vegn l’analisa da finanziaziun a la conclusiun ch’il budget da l’organisaziun po vegnir finanzià cun meds privats. Ils gieus olimpics e paralimpics en Svizra pudessan generar entradas en l’autezza da 1,5 milliardas francs tenor questas calculaziuns. Bunamain la mesadad contribueschia l'IOC. Il rest vegnia principalmain da sponsoring e da la vendita da bigliets. Questa calculaziun dal budget cuntegna er ina reserva bloccada da 200 milliuns francs.
Ussa decida il parlament da sport, l'organ central da Swiss Olympic, la fin da november davart il proxim pass.
