En Svizra èn uschè bleras persunas sco anc mai sortidas da la baselgia l’onn passà. Radund 34'500 persunas sajan sortidas da la Baselgia catolica e bundant 30'100 persunas da la Baselgia evangelica refurmada. Quai rapporta il SonntagsBlick che sa referescha a cifras da la statistica ecclesiastica da l’Institut pastoral-sociologic svizzer. Ils perscrutaders e las perscrutadras fan quint per quest onn cun anc dapli sortidas da la baselgia.
In dals motivs per las sortidas saja er il studi da l'Universitad da Turitg davart l'abus sexual en la Baselgia catolica. Ma er a la Baselgia refurmada na saja betg gartegià da far frunt al trend da sortir da la baselgia, sco Rita Famos, la presidenta da la Baselgia evangelica refurmada da la Svizra ha ditg envers il SonntagsBlick.
