Il 2020 aveva la baselgia catolica anc radund 86’000 commembranzas, in onn pli tard anc 84’100. Ina reducziun da radund 2’600 persunas. La baselgia refurmada dumbrava il 2020 63’800 commembras e commembers, in onn pli tard anc 62’500, in minus da 1’300 persunas. Sper mortoris e persunas ch’han bandunà il Grischun va la gronda part enavos sin persunas ch’èn sortidas ord las baselgias.
Nus realisain: sche las decleranzas da taglia ston vegnir inoltradas tar il chantun avain nus in peak tar las sortidas.
In impurtant motiv per la digren saja en omaduas baselgias ch’ins possia uschia spargnar taglia. Reducir offertas ni stritgar plazzas è il mument dentant nagin tema. Il grond problem tar la baselgia catolica saja d’insumma chattar spirituals. E quai vala er per la baselgia refurmada. Il criteri il pli impurtant per ils pertschient dad ina plazza saja il dumber dals commembers. Pitschnas raspadas cun pitschens pensums per la reverendessa han difficultads da chattar insatgi perquai ch’in minipensum na basta per viver.
I fiss da collavurar dapli, ma las raspadas n’èn anc betg prontas. I dovra in zic dapli squitsch.
Sper la pastoraziun han omaduas baselgias anc autras incumbensas en lur portfolio. Tar la baselgia catolica è quai per exempel la Caritas Grischun, il post da cussegliaziun da pèrs e da vita Paarlando ni las pli differentas organisaziuns da dunnas. Tar la baselgia refurmada è quai per exempel Benevol, in’organisaziun che metta il focus sin la lavur voluntaria. Lura er Adebar, in’organisaziun da cussegliaziun da famiglias ni la Crusch blaua che gida a persunas dependentas. Sper il sustegn da talas organisaziuns èn omaduas baselgias engaschadas en la pastoraziun speziala en ospitals, da persunas impedidas ni en praschun.
Il mument vegnan omaduas baselgias da mantegnair lur offerta. Ma sch’il dumber da commembras e commembers va anc pli fitg enavos, lura poi dar ch’igl è da discutar tge far.